Dbus-eko autobusak, ezusteko antzezlan baterako eszenatokia

Donostia 2016k eta Bagera elkarteak elkarrekin garatutako Euskarriak proiektuaren baitan (www.euskarriak.eus) egiten ari den “Antzerki soziala” ekimena dela eta, atzo, ostegunez, Dbuseko autobusak eszenatoki bihurtu ziren “Din dan don” antzezlanerako, zeinaren bidez euskararen erabilera bultzatzen baita. 

Antzezpenak 5-Benta Berri eta 25-Benta Berri-Añorga lineetako autobusetan egin ziren, Dbuseko autobus erabiltzaileak esuztean harrapatuz, aktoreak bidaiarien artean zeuden eta.  Horrela, autobusen barruan bidaiariek antzezlan txikiak ikusi ahal izan zituzten, ezustean, euskal kulturaren eta euskararen zabalkundearen gainean beste esperientzia bat edukita bidaian zehar. Era berean, “Antzerki soziala”-k ezusteko antzezpen gehiago programatu ditu ohikoak ez diren hiriko beste leku batzuetan.