Dbusek hurrengo geltokiaren berri emateko sistema berritu du beste linea batzuen iritsiera denborak gehituta

Autobus linea guztietan hurrengo geltokiaren berri emateko sistema hobetu du Dbusek. Sistema berriak beste linea batzuen iritsiera denborak ere ematen ditu, geltoki bakoitzean egin daitezkeen loturen gaineko informazio zehatzagoa eta zabalagoa edukitzeko. Horrenbestez, autobusez aldatu behar duten erabiltzaileek planifikatu ahal izango dute. Izan ere, autobusetako panelek bidaiariei jakinaraziko diete geltoki bakoitzean zein lotura egin ditzaketen eta zenbateko itxaron-epea izango duten. 

Hurrengo geltokiaren berri emateko sistemak autobusa non dagoen eta hurrengo geldialdiak non egingo dituen azaltzen die ibilgailuaren barruan doazen pertsonei,   modu errazean eta den-dena bi hizkuntzetan. Sistema 2015eko uztailean berritu zen, eta orain haratago doa, Dbuseko beste linea batzuekiko konexioa ez ezik zerbitzu horiek geltoki bakoitzera iristeko falta diren denborak ere adierazten ditu eta. 

Dbus egiten ari den berrikuntza teknologikoetako bat da sistemaren eguneraketa hau, berrikuntza horren asmoa baita teknologia berriak erabiltzea, zerbitzua hobetzeko eta erabiltzaileei informazio hobea emateko, eta ingurumena gehiago errespetatzen duen garraio publiko bat bultzatzea.