Author: Esti

Garraio Sistema Adimendunak (Intelligent Transport Systems) ibilgailu automatizatuen garapenean nola erabili izan da gaur, Donostian, Euskadiko Mugikortasun eta Logistikako Klusterrak antolatuta egin den Euskadiko VII. ITS Kongresuaren ardatza. Jardunaldian, Igor Gonzalezek, Dbuseko zuzendari gerenteak, etorkizunean ibilgailu autonomoarekin mugikortasuna nola kudeatuko lizatekeen azaldu du, konpainiaren ikuspegitik. 

Igor Gonzalezek mahai inguru batean parte hartu du, enpresa teknologiko eta ikerketako enpresa batzuekin batera, hala nola Tecnalia, Geograma/TomTom eta Vicomtech-IK4 enpresekin, eta bertan hiri batean ibilgailu elektrikoak erabiltzen hasteak mugikortasunaren kudeaketan dakartzan erronkez eztabaidatu du, bai eta giza baliabideak eta baliabide teknikoak eszenatoki berrira egokitu beharraz ere, erabiltzaileei garraio zerbitzua eskaintzeko modu berri bat ekarriko bailuke.

Citymobil2 proiektu pilotuaren kasua da, non Dbusek parte hartu baitu duela hilabete batzuk. Proiektu horrekin, gainera, gidaririk gabeko ibilgailu elektriko bat probatu zen Miramongo Parke Teknologikoan, azken miliako ibilgailu gisa,  langileak Dbusek Miramonen duen geltokitik beraien lanpostuetara eramaten.

Mahai inguruan, halaber, beste gai batzuez ere eztabaidatu da, hala nola egun eremu horretan egin diren garapen teknologikoez eta garapen horien etorkizuneko itxaropenez, bide segurtasunaz edo gizarte ereduaz.  

Dbusek bat egingo du Bide Indarkeriaren Biktimak Gogoratzeko azaroaren 20an ospatuko den Munduko Egunarekin.

Horregatik, egun horretan Donostiako hiri autobus guztiek egunaren kartela eramango dute, egoera hori bizi duten pertsonei babesa eta elkartasuna erakusteko eta kontzientzia sozial handiagoa lortzeko egingo diren jardueretan laguntzeko.

Gaur, Ulia aldean zerbitzua ematen duen Dbuseko TB6 Uliako Taxibusa Mercedes etxearen ibilgailu elektriko bat erabiltzen ari da. Ibilgailua Goiko-Autori laga zaio eta Taxi Donostia probatzen ari da, Gros eta Ulia bitartean dauden eskaerei erantzuteko Dbusekin batera eskaintzen duen zerbitzuan.

Lagapena Donostiako Udalaren Mugikortasun Departamentuak kudeatu du, hiriko taxi zerbitzuak ibilgailu horien ezaugarriak frogatu ahal ditzan, REPLICATE proiektu europarraren baitan, proiektuak 12 taxi elektrikoren erosketa diruz lagunduko baitu.  

Ibilgailu elektrikoa Mercedes etxearen Clase B 250E modelokoa da, eta gutxi gorabehera 200 km-ko autonomia du; beraz, gauez zein egunaren erdialdean kargatzen da. Ibilgailua iraunkorra da ingurumenaren aldetik, eta ez du batere zaratarik egiten eta ez du batere kutsadurarik igortzen, Dbusek bere flotan 20 autobus hibridoekin batera dituen 3 autobus elektrikoen antzera. Euskadiko flotarik ekologikoena da eta, mugikortasunari dagokionez, erreferentea da estatu mailan. 

Azaroaren 19an Haurtzaroan Sexu-Indarkeriaren Prebentziorako Nazioarteko Eguna ospatuko dela eta, Dbusek egun horren alde dagoela erakutsi nahi du egun horretarako GASJEk (Gipuzkoako Abusu Sexualak Jasandakoen Elkartea) antolatu dituen jarduerei babesa emanez.  

Horregatik, bihar, larunbata, Donostiako hiri autobus guztiek egunaren kartela eramango dute, egoera hori bizi duten pertsonei babesa eta elkartasuna erakusteko eta kontzientzia sozial handiagoa lortzeko egingo diren jardueretan laguntzeko.

Bihar, asteartea, azaroak 15, Entzutearen Eguna ospatuko da. Dbusek bat egin nahi du egun horretarako Gipuzkoako Itxaropenaren Telefonoak antolatutako jarduerekin, eta horren bidez hari babesa erakutsi, bere errealitatea beste norbaitekin partekatu behar duenari entzunez egiten duen lanagatik.

Horregatik, bihar Donostiako hiri autobus guztiek kanpainaren kartela eramango dute egun osoan.

Dbusek Mallorcako Garraio Partzuergoaren ordezkaritza baten bisitan hartu du bere instalazioetan. Mallorcako ordezkaritzako kideek Kotxetegietako instalazioak ezagutzeko aukera izan dute, eta Donostiako autobusetan instalatutako azken aurrerapen teknologikoen xehetasunak egiaztatu ere egiaztatu dituzte.

Ordezkaritzak Dbusen inplementatuko sistemak ezagutu ditu. Esaterako, antibunching-erako (autobusek bat ez egiteko sistema) eta gidatze eraginkorrerako sistema,  Ustiapenean Laguntzeko Sistema (SAE) edo Donostiako hiriko BRT sistema berritzailea (Bus Rapid Transit).

 Mallorcako ordezkaritzak autobus erabiltzaileentzako informazio sistemak ere ikusi ditu, izan ere, erabiltzaileek Dbusen web orriak, mugikorretarako app ofizialak, panel elektronikoak eta geltokietan informazioa QR kode, SMS eta Bluetooth bidez eskuratzeko dauden beste sistema batzuk erabili ditzakete autobusen iritsiera orduak ezagutzeko. Egiaztatu ahal izan dute, halaber, itsuentzako audio sistemaren funtzionamendua eta txartelak azkarrago eta eraginkortasun handiagoz balioztatzen dituzten makinak, bai eta autobusen erabilera, efizientzia eta segurtasuna kontrolatzeko eta alderdi horien hobekuntza kudeatzeko sistemak ere. 

Era berean, CTMko arduradunak interesatuta agertu dira Dbusek dituen autobus elektrikoez eta autobus hibridoez, ingurumena gehiago errespetatzen duen teknologia baitute, Dbus ekologiarekin eta iraunkortasunarekin etengabe konprometituta dagoela agerian utzita. Dbusek 3 autobus %100 elektriko ditu eta 16 autobus hibrido. Datozen asteetan, aurreikusita dago beste 4 ibilgailu hibrido helduko direla, beraz, 2016a bukatu baino lehen 12 metroko flotaren %25 ibilgailu elektriko-hibridoz osatuta egongo da.

Dbusen oso garrantzitsutzat jotzen dugu hiriko garraioaren hobekuntzan lanean ari diren enpresa eta erakundeekin harremanetan egotea, bere testuinguru partikularreko premietan zentratuta baina ikuspegi globalarekin, izan ere, kanpoko esperientzietatik ikasteko aukera ematen du eta etorkizuneko ikuspegi berri bat ere bai, lankidetza berriak eta baterako proiektuak sortzeko aukerak irekitzeaz aparte.