Category : Berriak home

Dbusek Deustuko Unibertsitateko ikasleei erakutsi die bere kudeaketa eredua

Javier Vallejok, Dbuseko zuzendari ondokoak, enpresa kudeatzeko eredua aurkeztu du Deustuko Unibertsitateko Ingeniaritza Informatikoko Graduko Enpresen Administrazioa irakasgaiaren eduki akademikoaren parte gisa.

Saioan, ikasleek Konpainiaren historia eta bilakaera ezagutu dute, baita enpresaren eguneroko funtzionamendua eta enpresako sailen antolaketa ere. Besteak beste, planifikazioko sistema adituak ezagutu ahal izan dituzte, zeintzuei esker eraginkortasunez kudeatu daitezkeen autobusak eta gidarien ordutegiak antolatzeko dauden giza baliabideak eta baliabide teknikoak. Horrela zerbitzua optimizatu egiten da, pertsona erabiltzaileei ordutegi zabalagoak eta maiztasun hobea eskainiz eta aldi berean flotako autobusak eta gidariei esleitutako ordutegi ezberdinak koordinatuz.

Era berean, azken urteotan Dbusen ezarritako azken berrikuntza teknologikoak ezagutu dituzte, hala nola autobusen okupazioak kontrolatzeko sistema eta eskaria iragartzeko sistema. Era berean, ustiapenean laguntzeko SAE sistemaren eta Dbuseko ticketing sistemaren funtzionamendua ikusi ahal izan dute, batez ere QR kodeekin eta kontakturik gabeko banku txartelekin zein gailu mugikorrekin ordaintzeko sistema; geltokiak sentsorizatzeko sistema, geltokiko erabiltzaileen zenbaketaren kontrol ia zehatza egitea ahalbidetzen duena, eskaera aurreikustea ahalbidetuta; edo Konpainiako autobusetako bidaiarien jatorria-helmuga matrizea, big datan oinarrituta. Azkenik, Smart-Klima sistemarekiko interesa agertu dute. Autobusen klimatizazio sistema monitorizatzeko eta bere funtzionamendua hobetzeko balio du sistema horrek.

Sesioan ikasleek Konpainia buru-belarri sartuta dagoen eta flota deskarbonizatu eta 0 emisioko flota bihurtzea ahalbidetuko dion elektrifikazio proiektua integrala ezagutu ahal izan dute. Proiektuaren barruan sartzen dira hornidura elektrikoaren egokitzapena, karga azpiegitura berrien hedapena, autobus elektriko berrien sarrera eta Dbuseko trafikoaren mantentze eta gestio arloen berrantolaketa, horrela trantsizio eraginkorra eta jasangarria bermatzeko.

Irakurri

“Dbus eta Gabonak” haurrentzako XIX. marrazki lehiaketa

“Dbus eta Gabonak” haurrentzako marrazki lehiaketaren beste edizio bat abiarazi du Dbusek, 13 urte baino gutxiago duten neska-mutilentzat.

Urteroko lehiaketa honen bitartez, 2025ean lehiaketaren 19. edizioa izango baita, neska-mutilen sormena sustatu nahi da eta Donostian garraio publikoa erabiltzeak duen garrantzia helarazi nahi zaie, Donostiako hiri guneen eta donostiarren bizi kalitatearen iraunkortasuna bermatzeko balio baitu. Gabonetan, zehazki, garraio publikoaren erabilera funtsezkoa da mugikortasuna efizientea izatea bermatzeko.

LEHIAKETAREN OINARRIAK

Parte hartzailea 13 urtetik beherako edozein haur izan daiteke eta gai libreko marrazki bat egin beharko du. Baldintza bakarra Gabonen inguruko ideia bat azaltzea izango da, autobusarekin erlazionatuta.

Marrazkiak Fnac-eko erakusmahaian entregatuko dira (San Martin Merkataritza Gunea), lehiaketaren antolaketako laguntzailea baita, edo Dbuseko bulegoetan (Fernando Sasiain, 7), eta marrazkien atzealdean parte hartzailearen datuak jarriko dira:

  • Izen-abizenak
  • Adina
  • Jaiotze data
  • Helbidea
  • Telefonoa eta harremanetarako posta elektronikoa
  • Ikastetxea
  • Baimendutako tutorearen izenpea

Ezinbestekoa da datu pertsonal guztiak adieraztea. Bestela, marrazkia lehiaketatik baztertuta geratuko da. Derrigorrezkoa izango da, halaber, formularioa betetzea parte hartzailearen legezko tutoreen baimenarekin:

> Baimen orria deskargatu (pdf)

Bi kategoria egongo dira:

  • A Kategoria: 8 urte artekoa, hau da, 2017an edo geroago jaiotako haurrentzat.
  • B Kategoria: 9 eta 12 urte artekoa; hau da, 2013an, 2014an, 2015ean edo 2016an jaiotako haurrek parte hartu ahal izango dute.

Marrazkiak jasotzeko azken eguna 2025eko azaroaren 11 izango da.

 

SARIAK

Epaimahaiak, Dbusek izendatua, kategoria bakoitzeko marrazki irabazleak hautatuko ditu.

  • Lehen saria: Lenovo Tab tableta, bere fundarekin + Donostiako Aquariuma bisitatzeko 4 sarrera.
  • Bigarren saria: Fujifilm Mini 12 Green argazki kamera + Donostiako Aquariuma bisitatzeko 4 sarrera.
  • Hirugarren saria: liburu sorta eta idazketako sorta + Donostiako Aquariuma bisitatzeko 4 sarrera.
  • Gainerako finalistek (4. postutik 10.era) Diploma bana jasoko dute.

 

Sariak banatzeko ekitaldia abenduaren 11n izango da, ostegunean, 18:00etan, Aquariumeko Auditorium aretoan.

Dbusek marrazkiak hedatu, publikoki erakutsi eta erreproduzitzeko eskubidea bere gain hartzen du, marrazkien egileek, euren lanaren autoretza onartzen zaielarik, inolako eskubiderik sortzen ez dutelarik. Marrazkiak Dbusen marketin kanpainetan erabiliak izan daitezke.

Lehiaketarako izena ematean parte hartzaileek ematen dituzten datuak Dbusen jabegokoa den fitxategi batean sartuko dira beraien tratamendurako, eta lehiaketan parte hartzea kudeatzeko erabiliko dira. Dbusen Pribatutasun Politikari buruz edota interesdunak honi lotuta dituen eskubideen erabileraz gehiago jakiteko, begiratu www.dbus.eus web orrian.

Marrazki finalistak DVbusen erakutsiak izango dira abenduan zehar eta Dbusen webgunean azalduko dira. Halaber, marrazkiak horretarako egokitutako leku publikoetan erakutsi ahal izango dira. Erakusketa amaitu ondoren, marrazkiak gorde egingo dira zaintzapean, hilabete bateko epean.

 

Irakurri

Dbusek 17 linearen eraldaketa aurkeztu du Garraio Publikoaren Nazioarteko Batasuneko adituen aurrean

Dbusek 17-Gros-Amara-Miramon linea eraldatu eta zirkulazio azkarreko zerbitzu elektriko eta adimendun bihurtzeko proiektua (BEI proiektua) aurkeztu du UITPk (Garraio Publikoaren Nazioarteko Batasuna) Coimbran (Portugal) antolatu duen Batzordean, non gaitasun handiko sistema mota horiek garatzen ari diren munduko hainbat lekutako hiriak bildu diren.

Dbusek BRT sistema du 5-Benta Berri eta 28-Amara-Ospitaleak lineetan eta une honetan 17-Gros-Amara-Miramon linean ezarriko den BEI (Bus Elektriko Adimenduna) etorkizuneko linean inplementatzea garatzen ari da. Sistemak hiru funtzio osagarri izango ditu: autobus artikulatu %100 elektrikoak erabiliko ditu, geralekuetako irisgarritasuna hobetuko da, eta autobusera ate batetik baino gehiagotik sartzeko aukera emango du.

Lan batzorde horretan, Javier Vallejok, Dbuseko zuzendari ondokoak, eta Eduardo Gonzalezek, Dbuseko zuzendari teknikoak, kalitate handiko autobus sistema honen (BRT) ezaugarriak aztertu dituzte garraio adituen aurrean, izan ere, autobus hauen funtsa da azkar eta eroso zirkulatzea, zirkulatzean lehentasuna ematen dioten errei berezien bidez, eta erabiltzaileei zerbitzu bikaina ematea. Sistemak ahalbidetzen du abiadura komertzial handia (16,60km/h) izatea eta Donostiako herritarren erabilera maila handia izatea. 2024an Dbusek bere historiako daturik onenak erregistratu ditu, zerbitzuetan 32.026.966 bidaia egin baititu, eta aurten seguruenik zifra horiek gaindituko dira, erabiltzaileen kopuruak berriro gora eginda.

Eduardo Gonzalezek batzordean azaldu duen bezala, geralekuetako irisgarritasuna hobetzeak espaloiaren eta autobusaren arteko distantzia murriztea ekarriko du, autobusera igotzea eta autobusetik jaistea erraztuta, eta arrapalen funtzionamenduko gorabeherak ere murriztuko ditu. Era berean, autobuseko ate batetik baino gehiagotik sartzeak eta irteteak autobusera sartzeko denborak hobetzea ahalbidetuko du, bidaia denbora murriztuta eta abiadura komertzial ona bermatuta. Javier Vallejok, berriz, autobusetan doazen bidaiarien kopurua eta baliozkotu diren bidaia txartelak kontrolatzeko ezarriko diren berrikuntza teknologikoak ere aurkeztu ditu.

Dbusen oso garrantzitsutzat jotzen dugu hiriko garraioaren hobekuntzan lanean ari diren enpresa eta erakundeekin harremanetan egotea, bere testuinguru partikularreko premietan zentratuta baina ikuspegi globalarekin, izan ere, kanpoko esperientzietatik ikasteko aukera ematen du, bai eta etorkizuneko ikuspegi berri bat lortzea ere, lankidetza berriak eta baterako proiektuak sortzeko aukerak irekitzeaz aparte.

Irakurri

DTK-k bere kudeaketa eredua aurkeztu du mugikortasun jasangarriari buruzko jardunaldi batean, “MoVer Ciudades” proiektuaren barruan

Donostiako Tranbia Konpainiak (DTK) bere kudeaketa eta efizientzia eredua eta Donostiako hiri garraioan ezarritako soluziorik berritzaileenak partekatu ditu gaur, Ekuadorko Hirietan Mugikortasun Berderako Proiektuaren (MoVer Ciudades) bisita teknikoan zehar, Donostian mugikortasun jasangarriari buruz antolatutako jardunaldian.

Ekuadorko tarteko hirietan emisio gutxiko hiri mugikortasun jasangarriaren inplementazioa indartu nahi duen proiektu bat da, ingurumena babesten eta herritarren bizi kalitatea hobetzen laguntzeko. Ekuador pertsona bakoitzeko berotegi efektuko gasen emisio gehien sortzen dituen herrialdeetako bat bihurtu da eskualdean, eta garraio sektorea da emisio horien %50 ingururen erantzulea.

MoVer Ciudades proiektua Global Gateway eta Europar Batasunak eta Alemaniako Lankidetza Ekonomiko eta Garapenerako Ministerio Federalak (BMZ) finantzatzen duten Europa Taldea: Itun Berde bat Ekuadorrentzat ekimenen parte da.

Jardunaldian, non mugikortasunean espezializatutako Ekuadorko zenbait teknikarik parte hartu baitute, DTK-ko zuzendari gerente Igor Gonzalezek Konpainiaren elementu bereizgarriak aurkeztu ditu, hau da, Konpainia sektoreko enpresa erreferente bihurtzen duten elementuak, eta, erabilera indize altua ez ezik, erabiltzaileen aldetik oso balorazioa ona edukitzea ahalbidetzen diotenak. Azken urteetan, antzinatasun handieneko garraio enpresa bat izatetik hiri mugikortasuna kudeatzen duen enpresa bihurtzera iritsi da, Dbusen bidez autobuseko garraio publikoko zerbitzua eta Dbizi bidez bizikleta publikoa alokatzeko sistema eskainita.

Ordezkaritzak enpresaren eguneroko funtzionamendua eta departamentuen antolamendua ezagutu ahal izan ditu. Besteak beste, planifikazioko sistema adituak ikusi ahal izan dituzte. Horiei esker, eraginkortasunez kudeatu daitezke autobusak zein gidarien ordutegiak antolatzeko dauden giza baliabideak eta baliabide teknikoak. Horrela, zerbitzua optimizatu egiten da, erabiltzaileei ordutegi zabalagoak eta maiztasun hobea eskainiz eta, aldi berean, flotako autobusak eta gidariei esleitutako ordutegi ezberdinak koordinatuz.

Aurkeztutako gaien artean, nabarmentzekoak dira tarifa sistema integrala eta Gipuzkoan, Bizkaian eta Araban, hurrenez hurren, erabiltzen diren MUGI, BAT eta BARIK garraio txartelen interoperabilitatea; izan ere, horri esker, Dbuseko ordainketa sistemak erosoak eta praktikoak dira erabiltzaileentzat. Horri lotuta, azken urteetan berrikuntza teknologiko ugari inplementatu dira, baliabideak optimizatzeko, benetako premietara egokitutako garraio sare bat diseinatzeko eta garraio publikora iristea errazteko, ordainketa sistemetan trabak ezabatuz. Dbusek munduko ticketing onena duen garraio publikoko operadorearen saria jaso du aurten, Londresen urtero banatzen diren Transport Ticketing Awards sarien banaketan.

Era berean, BRT sistema (Bus Rapid Transit) da aurkezpenean aztertutako beste puntu bat. Sistema hori linearik erabilienetako bitan dauka Dbusek (5 eta 28 lineak). Kalitate handiko autobus sistema bat da, zirkulazio azkar, eroso eta eraginkorrean oinarritua. Linea horiek, gainera, AENOR UNE-EN 13816 ziurtagiria daukate, zeinak lineen zerbitzuaren kalitatea aitortzen baitu. Zerbitzua beste inplementazio teknologikoekin indartu da, hala nola itsuendako audio sistemarekin edo zerbitzua denbora errealean geltokietan dagoen erabiltzaile kopurura egokitzen uzten duen sistemarekin.

Ildo horretan, garraio jasangarria bultzatzea da Dbusen lehentasunetako bat, elektromugikortasunean enpresa aitzindaria baita, 2014an Europan fabrikatutako lehen autobus %100 elektrikoa jarri zuena zerbitzuan. Gaur egun, Konpainia elektrifikazio proiektu integralean murgilduta dago, flotaren deskarbonizazioa ahalbidetzeko, 2030ean 0 emisioko flota izan dadin.

Proiektuaren barruan sartzen dira hornidura elektrikoaren egokitzapena, karga azpiegitura berrien hedapena, autobus elektriko berrien sarrera eta Dbuseko trafikoaren mantentze eta gestio arloen berrantolaketa, horrela, trantsizio eraginkorra eta jasangarria bermatzeko. Horrenbestez, Dbusen eta Udalaren apustua Bideberdea da, garraio publikoa zerbitzu garbi eta isil bihurtuko duena. Horrez gain, ordezkaritzak BEA (Bus Elektriko Adimenduna) proiektua ere ezagutu du, 17-Gros-Amara-Miramon linean ezarriko den gaitasun handiko sistema, zirkulazio azkarreko autobus %100 elektriko eta adimendunen bidez.

Halaber, aurkezpenean, Igor Gonzalezek Dbizi bizikleta publikoaren sistemaren funtzionamendua ere azaldu du. DTK arduratzen da sistema kudeatzeaz, Donostiako Udalak aginduta, sistemaren funtzionamendua hobetzeko eta bizikletaren erabilera sustatzeko, garraio publikoko beste modu batzuen osagarri gisa. Dbizi sistema berritua 2020ko abenduan jarri zen martxan, eta erreferentziazko sistema bihurtu da beste hiri batzuetarako. 2024an zerbitzuaren erabilera sendotu egin da, 1.294.358 bidaia egin baititu; aurreko urtean, berriz, 945.642 bidaia egin ziren.

Bukatzeko, Igor Gonzalezek enpresak gizartearen balioekin duen konpromisoa soziala azpimarratu du, zenbait elkarterekin dituen harremanetan eta kausa sozialen alde egindako lanean eratua. DTK-k garrantzi berezia ematen dio, halaber, leialtasuna eta sinesgarritasuna sortzeari, tokiko komunikabideekin eta herritarrekin harremana zuzena edukiz, eta enpatia sustatzeko eta gidariaren irudia indartzeko kanpainen bitartez.

Irakurri

Dbusek bere historiako daturik onenak erregistratu ditu urteko lehen seihilekoan

Donostiako Tranbia Konpainiak 17.041.235 bidaia erregistratu ditu urteko lehen seihilekoan, eta 2024an, denbora tarte berean, berriz, 16.093.375 bidaia zenbatu ziren. Horrek esan nahi du 2024an zenbatutakoak baino 947.860 bidaia gehiago izan direla eta urteko lehen seihileko batean orain arte erregistratu diren emaitzarik onenak dira. Bidaia horiek Dbuseko autobus zerbitzuan eta Dbizi bizikleta alokairu zerbitzuan erregistratutakoak biltzen dituzte.

 

  2025eko lehen seihilekoa 2024ko lehen seihilekoa Aldaketa
Dbizi 706.476 757.694 -51.218
Dbus 16.334.759 15.335.681 +999.078
GUZTIRA 17.041.235 16.093.375 +947.860

 

Dbuseko bidaiak lehen seihilekoan

2025eko ekainaren 30ean, urteko lehen seihilekoan 16.334.759 bidaia egin dira autobusean. Zifra horrek esan nahi du 2024ko denbora tarte berdinarekin alderatuta 999.078 bidaia gehiago izan direla; pandemia aurrean izan ziren zifra errekorrak baino 2 milioi bidaia gehiago direla.

 

Bestalde, azpimarratzekoa da Aste Nagusian autobusaren erabilerak %19,67ko igoera esanguratsua izan duela, 853.424 bidaiarekin, Aste Nagusi batean orain arte erregistratutako datu guztiak gaindituta.

Era berean, aurten Illunberako anezka zerbitzua jarri da eta zerbitzu horren erabilera %16,39 hazi da, 2024ko datuekin alderatuta, orduan zerbitzuak doakoa izateari utzi baitzion. Zehazki, 17.480 bidaia erregistratu ditu.

 

  2025 2024 Igoera (%)
Uztaila 6.409 4.902 %30,74
Abuztua 11.071 10.116 %9,44
GUZTIRA 17.480 15.018 %16,39

 

Dbiziko bidaiak lehen seihilekoan

Urteko lehen seihilekoan, 574.707 bidaia erregistratu dira Dbiziko zerbitzuetan, eta 2024ko denbora tarte berdinean, berriz, erregistratutako bidaiak 627.154 izan ziren. Horrek esan nahi du erabilera %8,36 jaitsi dela. Murrizketa hori baliteke urteko lehen hilabeteetako eguraldi txarrarekin lotuta egotea, erabileran eragin negatiboa izan baitu. Era berean, Dbizi bizikleta elektrikoak berrikusteko kanpaina batean murgilduta egon da, eta horrek bizikleta horien erabilgarritasunean eragin du. Hala ere, nabarmendu behar da ekaina izan dela 2025ean orain arte bidaia gehien erregistratu dituen hilabetea -128.623 bidaia- berriro maximo historikora iritsita.

 

  2024 2025
Urtarrila 89.199 71.541
Otsaila 86.706 81.441
Martxoa 97.251 86.573
Apirila 112.344 91.221
Maiatza 120.996 115.308
Ekaina 120.658 128.623
GUZTIRA 627.154 574.707

 

Abonatuei dagokienez, 2025eko ekainaren 30ean, zerbitzuak 13.954 abonatu erregistratu ditu guztira, eta, horrela, Dbizik martxan jarri zenetik izan duen abonatu kopuru handiena lortu du. Joera positiboa konstante mantendu da urteko lehen seihileko osoan.

Bestalde, bizikleta elektrikoa erabiltzeko joera  dago oraindik ere (%75), bizikleta mekanikoa erabiltzekoa baino joera handiagoa (%25). Dbiziko bizikletetan egindako bidaia gehienek 15 minutu baino gutxiagoko iraupena izan dute, eta horien atzetik 15-30 minutuko iraupena duten bidaiak daude. Datu horien arabera, bizikletak ahalik eta gehien txandakatzea lortzeko ezarritako helburua betetzen ari da.

Era berean, nabarmendu behar da uztailean eta abuztuan zerbitzuaren datuak iazkoen oso antzekoak direla, 255.216 erabilerekin  (2024an 254.991 erabilera izan ziren).

 

  2025 2024 Aldaketa
Uztaila 131.769 130.540 %0,94
Abuztua 123.447 124.451 -%0,81
GUZTIRA 255.216 254.991 %0,08

 

Udan ere handitzen jarraitu du abonatu aktiboen kopuruak: 15.192 izan dira eta 2024ko epe berean 13.508 erregistratu ziren. Hau da, %12,47ko hazkundea erregistratu da abonatuen kopuruan.

 

Irakurri

Dbusen erabileraren hazkunde ikusgarria Aste Nagusian, 853.424 bidaia erregistratu dira eta

Dbusenautobusen erabilera masiboa izan da 2025eko Aste Nagusian. Abuztuaren 9tik, larunbata, 16ra, larunbata, 853.424 bidaia egin dira Dbusen autobusetan. Hau da, 2024an erregistratutako 805.664 bidaiak baino %5,93 gehiago izan dira. Donostian garraio publikoaren erabileran lortutako kopuru errekorra izanda.

Hona hemen hirian autobusa gehien erabiltzen den Aste Nagusien rankinga:

  • Aste Nagusia 2025: 853.424 bidaia.
  • Aste Nagusia 2024: 805.580 bidaia.
  • Aste Nagusia 2010: 800.945 bidaia.
  • Aste Nagusia 2023: 769.121 bidaia.
  • Aste Nagusia 2009: 766.558 bidaia.
  • Aste Nagusia 2012: 765.505 bidaia.

 

Zifra horiek ikusita, oraindik behin-behinekoak diren arren, Dbuseko autobusak izan dira berriro ere Donostiako jaietan gehien erabili den garraiobide publikoa.

Aste Nagusiaren barruan, abuztuaren 14an, osteguna (2018ko Santo Tomas egunaren ondoren, 129.321 bidaiarekin, erabilera handiena izan duen eguna), abuztuaren 11n, astelehena, eta abuztuaren 13an, asteazkena, erabili da gehien autobusa; izan ere, 128.310 bidaia, 116.362 bidaia eta 116.275 bidaia erregistratu dira egun horietan, hurrenez hurren.

Hau da bidaien kopurua egunez egun:

  • Abuztuak 9, larunbata: 103.808 bidaia
  • Abuztuak 10, igandea: 80.744 bidaia
  • Abuztuak 11, astelehena: 116.362 bidaia
  • Abuztuak 12, asteartea: 114.161 bidaia
  • Abuztuak 13, asteazkena: 116.275 bidaia
  • Abuztuak 14, osteguna: 128.310 bidaia (Dbusen historian bigarren erabilera handiena izan duen eguna)
  • Abuztuak 15, ostirala: 115.239 bidaia
  • Abuztuak 16, larunbata: 102.872 bidaia

 

Aste Nagusian gehien erabili diren lineak Amarakoak izan dira (17, 21, 26 eta 28 lineak), 209.943 bidaiarekin, eta, ondoren, Antiguakoak (5, 25, 33, 40 eta 45 lineak), 177.615 bidaiarekin; Altza-Bidebietakoak (13-14 lineak), 145.268 bidaiarekin; Egia-Intxaurrondokoak (8, 9, 29 eta 42 lineak), 90.076 bidaiarekin; eta Aietekoak (18, 19, 23, 31, 32 eta 46 lineak), 89.443 bidaiarekin. Gainera, mikrobus lineetan 27.782 bidaia erregistratu dira.

Gautxorien lineen erabilera, berriz, %1,56 igo da aurreko urtearekin alderatuta, 38.868 bidaiarekin. Halaber, Illunbera joateko autobusen zerbitzuak %5,69 bidaiari igoera izan du 2024ko datuekin alderatuta, 4.273 bidaia zenbatu baitira.

Egun hauetan, Dbusek zerbitzu asko eskaini ditu, 23.400 zerbitzu baino gehiago izan baitira, eta zerbitzu horiek ematen 270 gidari aritu dira egunero, beste 45 pertsona gehiagoren laguntzarekin, batez ere ikuskatzaile eta tailerreko langileekin, autobus flota osoaren koordinazio eta funtzionamendurako beharrezkoak diraetaeta.

Irakurri

Larunbat honetan hasiko da Illunbeko aparkalekua eta hiri Erdigunea lotzeko anezka zerbitzua

Abisua: Abuztuaren 13an, 14ean, 15ean eta 16ean ez da anezka zerbitzurik izango zezenketak direla eta. 

Larunbatean, uztailak 12, hasiko da zerbitzua ematen Illunbeko doako aparkalekua eta hiri erdigunea lotuko dituen anezka autobusa, Dbusek eta Donostiako Udalak, Mugikortasun Departamentuaren bidez, sustatuta.

Anezka zerbitzuak Illunbeko doako aparkalekuaren eta Donostiako hiri erdigunearen arteko joan-etorriak errazten ditu, garraio publikoa sustatzeko eta hiriko trafikoa murrizteko helburuarekin. Azken urteetan, zerbitzua urteko bi garaitan eskaini da, Gabonetan eta udan.

Anezka zerbitzua 20 minutuan behin izango da, egunero, uztailaren 12tik, larunbata, abuztuaren 31ra, igandea, eta, orain bezala, bi geltoki izango ditu:

  • Illunbeko geltokia: irteerak 11:00etatik 22:20ra, 20 minutuan behin
  • Mendeurreneko plazako geltokia: irteerak 11:10etik 22:30era, 20 minutuan behin.

Tarifak eta ordaintzeko aukerak

Iaz bezala, hiriko gainerako linea erregularretan ohikoak diren tarifak aplikatuko zaizkio zerbitzu horri, eta Dbusen onartutako edozein titulurekin ordaindu ahal izango dira:
MUGI, BAT edo BARIK garraio txartelak, kontakturik gabeko banku txartelak eta lotutako gailu digitalak, QR txartelak eta noizbehinkako bidaia txartela.

Bidaia garraio txartelarekin ordaintzen dutenek auzo guztietara doako transbordoak egin ahal izango dituzte Dbuseko sarean. Era berean, garraio txartelik ez duten bisitariek QR kodea duen bidaia txartel berria eskuratu ahal izango dute, Dbuseko app ofizialaren bitartez, zeina iOS eta Androiderako eskuragarri dagoen. Bidai txartel horrekin, Dbuseko sare osoan nahi beste bidaia egin ahal izango dituzte, bidaia txartela erosi eta hurrengo 30 minutuz, 24 orduz edo 48 orduz.

Autobus %100 elektrikoa

Illunbetik hiri Erdialdera joan-etorriak egingo dituen ibilgailua 12 metroko autobus bat da, %100 elektrikoa eta zero igorpenekoa. MAN Lions City 12e modeloko autobusa da, eta Industria, Merkataritza eta Turismo Ministerioaren Helmugetako Jasangarritasun Turistikorako ezohiko deialdiaren barruan erosi da, Next Generation Europako funtsek finantzatuta.

 Igarako aparkalekua

Illunbeko aparkalekuaz eta bere anezka zerbitzuaz gain, Igarako gainazaleko aparkalekua (Bernardo Estornes Lasa kalea) prestatu du Udalak Park and Ride edo disuasio aparkaleku gisa. Aparkaleku horrek 220 plaza ditu, doakoa izango da eta konexio garrantzitsuak ditu Dbuseko linea erregular hauekin: 5, 25, 24, 27, 33, 35, 40, 43, 45 eta B1. Aparkalekurako sarbidea librea eta doakoa da, baina gehienez 24 orduz aparkatu ahal izango da bertan, txandakatzea errazteko

Irakurri

Ekainaren 23tik aurrera Dbusek zerbitzu gehiago emango ditu udan

Ekainaren 23an, astelehenean, San Juan bezperan, Dbuseko udako zerbitzuak hasiko dira, eta abuztuaren 31ra arte, igandea, eskainiko dira. Udan, halaber, Dbusek zerbitzu bereziak eskainiko ditu denboraldiko ekitaldirik garrantzitsuenetarako.

Era berean, berriro jarriko da abian Illunbeko aparkalekuaren eta hiriko Erdialdearen arteko anezka zerbitzua.

 

1.Gautxori zerbitzua, ekainaren 23an, San Juan bezperan

Ekainaren 23an, San Juan bezperan, Dbusek auzoetara dituen autobus zerbitzuen ordutegiak luzatuko ditu eta 1:00ak arte egongo dira gautxori zerbitzuak Boulevardetik. Hauek izango dira zerbitzuak:

> Ordutegiak ikusi (pdf)

 

2.Dbus zerbitzu gehiago auzoetara

Ekainaren 23tik abuztuaren 31ra arte, hiriko gune gehienetan aparteko zerbitzuak egongo dira; izan ere, udan autobusek beranduago egingo dituzte azken irteerak, eta asteko egun guztietan zerbitzuak beranduago bukatu dira. Hauek dira zabaltzen diren ordutegiak:

> Ordutegiak ikusi (pdf)

 

3.Gautxori zerbitzu gehiago ostiral, larunbat eta jai bezperetan

 Ekainaren 23tik abuztuaren 31ra arte, asteburuko gautxori zerbitzuak goizaldeko 4:00etan amaituko dira, ostiral, larunbat eta jai bezpera guztietan. Boulevardetik irtengo dira.

> Ordutegiak ikusi (pdf)

 

4.Gaueko zerbitzua Igeldora ekainaren 23tik aurrera

Ekainaren 23tik aurrera, astelehena, eta abuztuaren 31ra arte, igandea, 16 lineak zerbitzu gehiago emango ditu Boulevard 19tik, 23:05ean eta 0:00etan beste bi irteera gehiagorekin. Iraileko ostiral, jai bezpera eta larunbatetan ere egongo dira irteera horiek.

Era berean, ekainaren 23tik abuztuaren 31ra arte Igeldo auzoak autobus zerbitzua izango du gauean, ostiral, larunbat eta jai bezperatan, B7-IGELDO gautxoriarekin. Gautxoria 1:00etan, 2:00etan, 3:00etan eta 4:00etan aterako da Boulevardetik eta Kontxa pasealekutik joango da zuzenean Igeldoraino eta Kanpineraino. Aurten, gainera, modu esperimentalean, lineak iraileko asteburuetan ere emango du zerbitzua, baina kasu honetan, ostiraletan eta jai bezperetan azken irteerak 3:00etan izango dira, gainerako gautxori lineetan bezala (neguko ordutegia).

 

5.B2 linearen ibilbidea Miramon, Mikeletegi eta Ospitaleetaraino luzatuko da

Ekainaren 23tik aurrera, Erdigunea Aiete eta Bera Berarekin lotzen duen B2-Aiete-Bera Bera linean ere hobekuntzak egongo dira. Hala, ibilbidea luzatuko da, Miramon, Mikeletegi eta Ospitale inguruari ere zerbitzua emateko, erabiltzaileen beharretara egokituago dagoen zerbitzua eskainita. Hobekuntza hori esperimentala izango da; beraz, udan egingo da proba, eta irailaren 27an, larunbata, amaituko da. Proba hori amaitu ondoren, emaitzak aztertuko dira.

> Informazio osoa ikusi (pdf)

 

6.Zerbitzu bereziak udako ekitaldietarako

Aparteko autobus zerbitzuak egingo dira hirian udan egin ohi diren ekitaldietarako (Jazz Jaialdia, Aste Nagusia, kontzertuak, etab.). Informazioa ekitaldi bakoitzean emango da bereziki.

 

7.Maiztasun handiagoa 24 eta 27 lineetako autobusetan

Ekainaren 23tik abuztuaren 31ra arte, jaiegunetan 24-Altza-Gros-Antigua-Intxaurrondo eta 27-Altza-Intxaurrondo-Antigua-Gros lineetan autobusak 30 minutuko maiztasunez ibiliko dira, izan ere, hil horietan asteko egun guztietako ordutegiak bateratuko dira.

 

8.39-Urgull lineak ez du zerbitzurik emango udan

2025eko udan, Dbuseko 39-Urgull mikrobus lineak ez du zerbitzurik emango.

 

9.Anezka zerbitzua Illunbeko aparlekutik Erdialdera

Abisua: Abuztuaren 13an, 14ean, 15ean eta 16ean ez da anezka zerbitzurik izango zezenketak direla eta. 

Uztailaren 12tik aurrera, larunbata, abuztuaren 31ra arte, igandea, Dbusek eta Donostiako Udalak, Mugikortasun Departamentuaren bitartez, autobus anezka zerbitzua jarriko dute berriro, Illunbeko aparkalekua eta hiriko Erdialdea lotzeko. Hiriko gainerako linea erregularretan ohikoak diren tarifak aplikatuko zaizkio zerbitzu horri.

> Informazio osoa ikusi (pdf)

 

10.“Dbus gehiago, uda gehiago” udako kanpaina

Uda iritsi da eta Dbusek garraio publikoan mugitzera animatzen ditu berriz ere donostiarrak eta bisitariak, hiriak eskaintzen dituen plan guztiez gozatzeko, HANDIKIRO gozatzeko. “Dbus gehiago, uda gehiago” lelopean, ordutegi zabalagoak eskainiko ditugu ibilgailu pribatuaren alternatiba hobea izateko eta Donostia hiri erosoagoa, jasangarriagoa, bizigarriagoa eta kerik eta zaratarik gabekoa izan dadin.

Gure eguneko 32 lineek eta gaueko 9 lineek sare zabal bat osatzen dute eta merke eta kezkarik gabe mugitzeko eta hiriko trafikoa arintzeko modurik onena dira.

Uztailaren 1etik aurrera 15 urtetik beherakoek doan bidaiatuko dute Dbusen

Uztailaren 1etik aurrera, asteartez, MUGI, BAT eta BARIK txartel pertsonalizatua duten 15 urtetik beherakoek doan bidaiatuko dute Dbuseko linea guztietan. Horrela, hiru urte luzatu da adingabeek doan bidaiatzeko duten adin tartea. 15 urte bete ondoren txartela ordaindu beharko dute.

Doan bidaiatu ahal izateko, 15 urtetik beherakoek MUGI, BAT edo BARIK txartel pertsonalizatua izan beharko dute. Jada txartel pertsonalizatua dutenek ez dute doakotasuna aktibatzeko ezer egin beharko. Horretarako, balidatzeko makinen softwarea eguneratu da, txartelak irakurtzean 6 eta 15 urte artekoei inolako zenbatekorik ez kargatzeko.

Aurten arte, 6 urtetik beherakoek bakarrik bidaiatzen zuten doan. Kolektibo horrek ez du garraio txartelik eta neurri berriak ez du beraientzat aldaketarik. Garraio txartelik gabe doan bidaiatzen jarraituko dute. Aurtengo otsailean, doako txartela 6 eta 11 urte bitartekoei ere zabaldu zitzaien, MUGI, BAT edo BARIK txartel pertsonalizatuarekin, eta uztailetik aurrera, 15 urtetik beherakoetara zabalduko da. Hau da, 12 eta 14 urte bitarteko pertsonena da kolektibo onuradun berria.

Dena den, MUGI, BAT edo BARIK txartel pertsonalizatua ez duten 6tik 14ra urtera arteko haurrek ezingo dute doan bidaiatu. Txartela eskatzeko MUGIk, BATek eta BARIKek herritarren arretarako dituzten bulegoetara joan beharko dute.

 

Tarifak eguneratzea

Era berean, datorren asteartetik aurrera, uztailak 1, Dbuseko tarifak aldatuko dira bidaia MUGI, BAT edo BARIK txartelekin ordaintzen duten erabiltzaileentzat, horiei aplikatu beharreko deskontuen eguneraketaren arabera (%50ekoak izan beharrean %40koak izango dira). Ezarritako deskontuek Garraio eta Mugikortasun Jasangarriko Ministerioaren finantzaketa dute. Era berean, 25 urte bete gabe dituzten pertsonek %50eko hobaria jasotzen jarraituko dute, MUGI Gazte txartel pertsonalizatuaren bidez.

Uztailaren 1etik aurrera, Dbusen tarifa sistema berria hau izango da:

 

Bidaia txartela 2022/7/1a baino lehenagoko prezioa 202/7/1etik aurrerako prezioa
Noizbehinkako bidaia txartela, egunekoa 1,85 € 1,85 €
Noizbehinkako bidaia txartela, gauekoa 2,50 € 2,50 €
MUGI Txartela
1-20 bidaia 0,49 € 0,59 €
21-50 bidaia 0,40 € 0,48 €
51. bidaiatik aurrera 0,10 € 0,12 €
MUGI GazteTxartela
1-20 bidaia 0,49 € 0,49 €
21-50 bidaia 0,40 € 0,40 €
51. bidaiatik aurrera 0 € 0 €
MUGI Txartel anonimoa 0,65 € 0,78 €
BAT eta BARIK Txartelak 0,49 € 0,59 €

Aurreikusita dago, halaber, laster Dbuseko noizbehinkako txartelen prezioak eguneratzea, bai eguneko txartelena, bai gaueko txartelena. Garraio titulu bien prezioak 2020tik izoztuta egon dira, eta 10 eta 15 zentimo igoko dira, hurrenez hurren. Erabiltzaile ez-errepikarientzako txartel digitalen prezioa ere eguneratuko da.

 

Irakurri

BEI autobus lineari zerbitzua emango dion aparkalekua elektrifikatzeko lanak lizitatu ditu Dbus-ek

Dbusek Kotxetegietako kanpoko aparkalekua elektrifikatzeko azpiegiturarekin lotutako lanak eraikitzeko eta abian jartzeko lizitazio plegua argitaratu du. Aparkalekua eraikin nagusiaren ondoan dago eta BEI (Bus Elektriko Adimenduna) autobus linea berriari zerbitzua emango dio.

17-Gros-Amara-Miramon linea zerbitzu %100 elektriko bihurtzeko, beharrezkoa da kotxetegietako aparkaleku berria, 2021ean inauguratu zena, beharrezko azpiegitura elektrikoz hornitzea, linearako aurreikusita dauden bederatzi ibilgailuak kargatzea ahalbidetuko duten karga estazioak izateko.

Azpiegituraren barruan instalazio elektriko osoa (hartunea, tentsio ertaina eta behe tentsioa), datuen sarearen azpiegitura, beharrezko egitura metalikoa, baterien karga eta suteen aurkako babesaren instalazioa sartzen dira. Eskualde Garapeneko Europako Funtsarekin (FEDER) kofinantzatuko da, FEDER 2021-2027 Euskadiko Programaren esparruan.

Hain zuzen ere, 2024aren amaieran amaitu ziren Kotxetegietako barneko eta goiko aparkalekuko azpiegitura elektrikoa elektrifikatzeko lanak, eta eraikineko 119 aparkalekuak (barrukoak eta kanpokoak) karga azpiegiturarekin hornituta geratu ziren. Era berean, 22 karga puntu instalatu ziren, eta 60 pantografo alderantzikaturi eusteko egitura metaliko bat ere bai.

Kotxetegietako aparkaleku berria elektrifikatuta, Kotxetegietako instalazio guztiak ibilgailu elektrikoak kargatzeko egokituta egongo dira, 2030erako flota %100 elektrikoa izateko Dbusek duen helburuarekin lerrokatuta.

 

Epeak eta egin beharreko lanak

Obra gauzatzeko gehieneko epea 200 egun baliodunekoa izango da guztira, eta baldintza izango da hirigintza planeamenduko tresnak onartzea eta ondoren dagozkion hirigintza lizentziak lortzea. Lizitazioaren oinarriko aurrekontua 4.931.623,59 eurokoa da (BEZa sartu gabe)

 

BEI sistema 17 linea osoan

Linea guztiak aztertu ondoren, 17-Gros-Amara-Miramon linea aukeratu zen BEI-Bus Elektriko Adimendunaren Sistema ezartzeko, linea estrategikoa baita; izan ere, Euskotrenen eta Dbusen arteko intermodalitatea ziurtatzea ahalbidetzen du, Topoaren linea Anoetako geralekutik pasatzeari esker. Gainera, 15 km inguruko ibilbidearekin, linea horrek Gros, autobus eta Renfe geltokiak, Amara, Donostiako ospitale gunea eta Miramongo parke teknologikoa lotzen ditu.

BEI emisiorik gabeko garraiobide elektrikoa izango da, eta hiri jasangarriago bat, kerik gabeko eta kutsadura maila baxuko hiri bat egiten lagunduko du. Gainera, oro har, hobekuntza ugari eskaintzen ditu, eta hobekuntza horiek lagunduko dute erabiltzaileek bidaia esperientzia oso ona izaten. Azpimarratzekoa da, adibidez, autobusera igotzeko eta bidaia egiteko denborak murriztuko direla, sartzeko ate gehiago gaituko direlako, ordaintzeko funtzionalitate batzuk autobusean sartu gabe egin ahal izango direlako, semaforoetan lehentasuna izateko sistemak egongo direlako, etab.

Autobusen barrualdea ere gidariengan zein erabiltzaileengan pentsatuta diseinatuko da, diseinu abangoardista eta erosoagoa izango dute-eta. Nabarmenduko dira zoruak, zura itxura izango dutenak, eta argiztapen puntu berriak, esaterako.

Aurreikusita dago, halaber, BEI autobusen markesinek diseinu berritzailea izatea eta funtzionalitate berriak eskaintzea, hala nola informazioa alde bietatik ematen duen pantaila digitala eta 17 linea identifikatzeko totema, LED argiekin eta minutuak adierazita. Zutoinak dituzten geltokiek ere totem identifikatzailea izango dute, baita pantaila digitala ere.

Linearen elektrifikazioarekin, egungo diesel autobusen ordez 18 metroko bederatzi autobus elektriko artikulatu jarriko dira, eta autobus berri horiekin edukiera hobetuko da eta erabiltzaileak erosoago joango dira. Era berean, BEI linea berria abian jarrita, urtean 239.528 litro gasolio kontsumitzea eta 645 Tn CO2 gutxiago isurtzea aurreikusten da.

 

Erakundeen arteko hitzarmena

2022ko otsailean Eusko Jaurlaritzak eta Donostiako Udalak hitzarmen bat sinatu zuten hirian autobus elektriko adimendunaren sistema ezartzeko, 25,7 milioi euroko aurrekontuarekin. Eusko Jaurlaritzak, FEDER 2021-2027 Euskal Autonomia Erkidegoko Programaren bidez, proiektuaren kostuaren %65 kofinantzatuko du. Donostiako Udalak, berriz, gainerako %35a jarriko du, hau da, 9 milioi euro.

Irakurri