Dbus, 140 urte zurekin
2026an 140 urte beteko dira Donostiako Tranbia Konpainia sortu zenetik, 140 urte donostiarren hainbat belaunaldik garraio kolektiboaren alde egiten eta enpresa hiriaren zati banaezin gisa hazten eta eboluzionatzen.
1886ko udan eratu zen DTK, Gipuzkoako enpresarik zaharrenetakoa eta gaur egun Dbus izen komertzialarekin oraindik ere martxan dagoena. Zerbitzua 1887an hasi zen, zaldiek tiratutako tranbiekin; ondoren, tranbiak eta trolebus elektrikoak martxan jarri ziren, eta, azkenean, 60ko hamarkadatik 70ekora bitartean horiek autobusekin ordeztu ziren. Hau da, DTKren flota eraldatuz joan da, hiriaren bilakaerarekin batera.
Gaur egun, Dbusek bere historiako eraldaketa handienetako bat bizi du, bere flota eta Kotxetegietako instalazioak elektrifikatzen ari baitira. Mugikortasun eredua aldatzeko apustua, ingurumenean duen inpaktua arintzeko eta ahalik eta gehien murrizteko, eta erabiltzaileen esperientzia are gehiago hobetzeko. Konpromiso soziala eta Donostiako herritar guztientzat etorkizun hobea nahi duen hiri proiektua ere bada, une honetan Dbus bidaien datu historikoak erregistratzen ari da-eta.
Horregatik, uda honetan eskerrak eman nahi dizkizugu zure bizitzaren parte egiteagatik. 140 urte elkarrekin bidaiatzen.
#Dbus140UrteZurekin
#Dbus140añosContigo
Dbusen 41 linean aldaketak ekainaren 23tik aurrera
Ekainaren 23an, asteartean, Dbusek 41-Gros-Egia-Martutene linearen ibilbidea aldatuko du, linearen funtzionamendua hobetzeko. Linea horretako zerbitzuaren eskaera handitu izanak, Larrunmendin egiten ari diren obrekin batera, puntualtasunak eta abiadura komertzialak okerrera egitea ekarri du. Horregatik, linearen funtzionamendua arintzeko aukera emango duten doikuntzak egingo dira ibilbidean, bi noranzkoetan. Aldaketa horiek aldi baterako izango dira eta Martuteneko lanak amaitzean lehengo ibilbidea egitera bueltatuko da.
Loiolako Erriberetan (Gros alderantz):
- Bartzelona 35 eta Bartzelona 15 geralekuak lekualdatu egingo dira, eta horietan gelditu ordez Bartzelona 37 izeneko geraleku berrian geldituko da. Geraleku horietatik 35 metrora eta 250 metrora egongo da, hurrenez hurren, geraleku berria. Horrela, auzotik egingo duen ibilbidea laburragoa izango da.
Txomin Enean (Martutene alderantz):
- Txomin Eneako Anbulatorioa eta Felisa Martin Bravo geralekuak Renfe Loiolara lekualdatuko dira. Geraleku hori lekualdatutako geralekuetatik 130 metrora eta 400 metrora dago, hurrenez hurren. Horrela, zerbitzuak ez dira Txomin Enearen barrualdetik ibiliko.
Dbusek 466 tona CO2 isurtzea saihestu zuen 2025ean, autobus elektrikoei esker
Emisio horiek gure hirian 20.000 zuhaitz landatzearekin parekatu daitezke.
Dbusek zero emisioko garraio publiko baten alde egindako apustu argi eta irmoari esker, 2025ean gure hirian 466 tona CO2 isurtzea saihestu da. Flota apurka-apurka deskarbonitzatzeak eta horrela 2030ean flota %100 elektrikoa eta CO2 emisiorik gabekoa izatea lortzeak, hau da, Bideberdea proiektuak, airearen kalitatea nabarmen hobetzea eta kutsadura akustikoa murriztea dakar, Donostia espazio atseginagoa bihurtuta.
Gaur ospatuko den Ingurumenaren Egunarekin batera, Dbusek kanpaina bat abian jarri du, ibilgailu berri horiek gure hirirako jada ekartzen ari diren onuren berri emateko, jasangarriagoa den eta gutxiago kutsatzen duen garraio publiko bat izateak dakartzan abantailak argi eta zuzenean nabarmentzen dituen mezu batekin.
Bideberdearen bide berdeari jarraituz, kanpaina hiriko hainbat gunetatik igarotzen ari da, autobus flota izaten ari den eraldaketa jada nabaria den guneetatik, hain zuzen; izan ere, 2025ean flotak emisioak gutxitu zituen, eta emisio gutxitze hori 20.000 zuhaitz landatzearekin parekatu daiteke. Teknologia aurreratuagoa duen eta ingurumena errespetatzen duen flota bat lortze aldera egindako lan horren ondorioz, Dbusek 56 autobus %100 elektriko eta 55 autobus hibrido ditu zerbitzuan, Donostia elektromugikortasuneko erreferente gisa Europan duen posizioa indartuta eta emisio kutsagarririk gabeko hiri baten alde eginda.
Dbus, Global Mass Transit nazioarteko konferentziara gonbidatua, bere elektrifikazio eredua aurkezteko
Dbusek flota eta Kotxetegietako instalazioak elektrifikatzeko duen proiektua aurkeztu du Amsterdamen, Global Mass Transit erakundeak antolatutako “Clean Buses in Europe” nazioarteko konferentziaren 9. edizioan. Topaketa horretan Europako garraio publikoko operadore nagusietako batzuek parte hartu dute, hala nola EMT Madrid, Transport for London, Gobus, Translink edo Dublin Bus, zero emisioko garraio publikoko sistemetarako bidean aurrera egiten dituzten esperientziak eta estrategiak partekatzeko.
Dbusek nazioarteko foro horretan parte hartzeak agerian uzten du Konpainia garatzen ari den eraldaketa proiektuak lortutako aitortza, dimentsio askoz handiagoko operadoreen eztabaida tekniko eta estrategiko maila berean kokatu baita.
Jardunaldi horietan, Eduardo Gonzalezek, Dbuseko Zuzendari Teknikoak, flota deskarbonizatzeko prozesuaren berri eman du, zeina flota%100 emisiorik gabekoa izateko eraldaketa integralerako makroproiektu estrategiko gisa pentsatu baita. Makroproiektu hori elkarri lotutako jarduera ildo askotan egituratzen da, tartean direla hornidura elektrikoa handitzeko eta tentsio ertain eta baxuko azpiegiturak hedatzeko jarduerak, eta pantografo alderantzikatuaren bidez kargatzeko sistemak eta energiaren kudeaketa adimenduna (Smart Charging) ezartzeko, aparkatzeko lekuak egokitzeko eta autobus elektrikoak apurka-apurka sartzen joateko jarduerak ere bai.
Proiektuaren barruan, gainera, ibilgailuak eta azpiegiturak gainbegiratzeko eta monitorizatzeko sistema aurreratuen garapena sartzen da, bai eta ibilgailu elektrikoetarako suteetatik babesteko azpiegitura espezifiko berriak gauzatzea ere, hori baita Europako operadoreek elektrifikazio prozesuaren gaineko teknologiei eta arauei lotuta egun dituzten erronka nagusietako bat.
Flotaren eraldaketa Bideberdearen parte da, hots, Dbusek eta Donostiako Udalak garraio publikoa zerbitzu garbi, eraginkor eta isila bihurtzeko eta 2030ean Dbuseko flota %100 jasangarria izan dadin egindako apustuaren parte. Teknologiaren aldetik aurreratuagoa eta ingurumena errespetatzen duen flota baterantz egindako lan horren ondorioz, gaur egun Dbusek 56 autobus %100 elektriko eta 55 autobus hibrido ditu zerbitzuan.
Nazioarteko jardunaldietan parte hartuz, Dbusek garraio operadoreekin, fabrikatzaileekin, ingeniaritzekin eta sektoreko profesionalekin ezagutzak eta esperientziak partekatu ditzake, azken joera teknologiko eta operatiboak bertatik bertara ezagutzeaz gain. Era berean, Donostiak elektromugikortasuneko erreferente gisa Europan duen posizioa indartzen du, 2014an Europako fabrikazioko autobus elektriko bat zerbitzuan jarri duen Europako lehen hiria baita, eta hiri garraio publikoaren deskarbonizazio osorako bidean irmo aurrera egiten ari baita.
Aranzadi Zientzia Elkarteak eta Dbusek hiri biodibertsitateari buruzko kanpaina bat bultzatzen dute Donostiako markesinetan
Biarteko Mugi proiektuaren barruko ekimen bat da, eta zientzia eta artea uztartzen ditu hiriko natura herritarrengana hurbiltzeko.
Aranzadi Zientzia Elkarteak eta Dbusek hiriko biodibertsitateari buruzko dibulgazio kanpaina bat jarri dute abian Donostiako autobusetako markesinetan. Hiriko hainbat tokitan jarriko diren 32 kartelen bidez, kanpaina honek hiriko ingurunean donostiarrekin batera bizi diren espezieak ezagutzeko eta hiria ikuspegi berri batetik begiratzeko gonbita egiten die herritarrei.
Kartel bakoitzak espezie baten ilustrazio zientifikoa aurkezten du. Intsektuen, hegaztien, anfibioen, landareen edo likenen ilustrazioak dira, besteak beste. Ilustrazioaren atzealdean, Donostiako toki zehatz bat agertuko da. Irudikatutako espeziea aurki daitekeen lekua izango da. Horrela, basa bizitza presente dagoen eguneroko eta ustekabeko lekuak erakusten dira.
Hala, kartel horiei begira hiritik dabiltzanek hormako sugandila ikusi ahal izango dute Urgullen, armiarma karramarroa Igeldon, mantangorria Aieteko Parkean edo hegoaldeko zuhaitz-igela, Dbusen logotipoa ere badena, Igarako putzu batean. Izan ere, espezie deigarrienak ez ezik, txikienak eta diskretuenak ere harrigarriak dira, espaloi, horma edo hiri lorategietan benetako fenomeno ekologikoen protagonista dira-eta.
Dbuseko mupietan aukeratutako espezie guztiak erraz ikusten dira, eta, beraz, ohikoak dira Donostian. Kanpaina ekainaren amaiera arte egongo da martxan, eta, gainera, Biarteko Mugi proiektuaren ibilbideen aurrerapen txiki bat da, ibilbide horiek laster egin ahal izango baitira hiritik. Ibilbide horiek, ikus-entzunezko pieza txikien bidez, Donostiako biodibertsitatea eta horri lotutako prozesu ekologikoak gerturatuko dizkigute.
Kartelen kokapena (mapan ikusi)
EGIA – ERRIBERAK – LOIOLA
- Polloeko hilerria – Horma-goroldioa
- Epaitegia / Mandasko Dukea – Erle-eulia
- Loiola / Lorategi hiria – Meatze-erlea
- Bartzelona Hiribidea 35 – Katamotz armiarma
ERDIALDEA – BOULEVARD – GIPUZKOA PLAZA
- Askatasunaren Hiribidea 34 – Inurri beltza
- Boulevard 17 – Dragoitxo arrunta
- Boulevard 7 – Liken horia
- Mirakruz Gaina II – Arrabio arrunta
- Okendo 10 – Horma-sugandila
GROS – ATEGORRIETA – INTXAURRONDO – ALTZA
- Ategorrieta 21 – Txilar kantauriarra
- Otxoki – Armiarma jauzkaria
- Jesuitak – Garaizka arrunta
- Pablo Sorozabal plaza /Zarategi – Amiral gorria
- Elosegi 21 / Ategorrieta – Zozo arrunta
ALTZA – BUENAVISTA
- Arri Berri – Aihen zuria
- Buenavista 12 – Kaskabeltz handia
AIETE – SEMINARIOA – MIRAMON
- Mikeletegi pasealekua (Poliklinikaren atzean) – Afrikar gorria
- Oriamendi pasealekua 20 – Arkanbelea
- La Cumbre – Mantangorria
- Mendigain 1 / Zorroaga – Hurritza
- Seminarioa – Liztor buztingilea
ANTIGUO – FUNIKULARRA – IGELDO – ZUATZU
- Tolosa Hiribidea / Antonio Gaztañeta – Krustazeo likena
- Miramar Jauregia – Liztor lorea
- Zubimusu – Murruntza
- Kristobal Balenziaga 42 II / Igeldo – Armiarma karramarroa
- Tolosa Hiribidea / Irakasle Eskola – Sorbeltz arrunta
- Zuatzu – Laharra
IGARA – PORTUETXE
- Portuetxe – Hegoaldeko zuhaitz-igela
AMARA ALDEA – ZORROAGA – OSPITALEAK
- Begiristain Doktorearen pasealekua 94 – Zimitz marraduna
- Pio XII.a – Txikori belarra
- Madril Hiribidea 3 – Etxe-txolarrea
- Antso Jakituna 12 – Belatz-eulia
Aldaketak Dbusen 16 eta 28 lineetan maiatzaren 1etik aurrera, ostirala
Maiatzaren 1ean, ostiralean, aurreikusita dago Dbusek 16-Igeldo eta 28-Amara-Ospitaleak lineetan aldaketak martxan jarriko dituela, bi lineetan puntualtasuna hobetzeko eta ordutegiak hobeto betetzeko. Hauek dira egingo diren aldaketak.
16-IGELDO:
- Irailaren 1etik ekainaren 22ra: linearen maiztasuna 30 minutukoa izango da (maiatzaren 1ean hasiko da). Hori dela eta, Igeldoko eta Boulevardeko irteera orduak aldatuko dira, eta honela geratuko dira:
-
- Irteerak Boulevardetik: xx:00h eta xx:30h
- Irteerak Igeldotik:
– 9:30ak arte: xx:00h eta xx:30h (aldaketarik gabe).
– 9:30etik 21:30era: xx:15h eta xx:45h.
– 21:30etik aurrera: xx:00h eta xx:30h (aldaketarik gabe).
- Ekainaren 23tik abuztuaren 31ra: 20 minutuko maiztasuna.
Ordutegi eta maiztasunen aldaketak ez du eraginik geralekuen definizioan, ezta ibilbidean ere, aldaketarik gabe mantenduko dira-eta. Horrela, lineari fidagarritasuna eman nahi zaio urte osoan, herritarrei zerbitzu puntuala eta kalitate handiagokoa eskainiz.
- 28-AMARA-OSPITALEAK:
Zehazki, astegunetan Boulevardeko irteera ordu batzuk aldatuko dira 7:10etik 8:55era bitartean (7:20tik 9:19ra bitartean Miramonetik), maiztasuna 7 minutukoa izango baita. Larunbatetan, 11:05etik 21:12ra bitartean Boulevardeko irteera orduak aldatuko dira (11:31tik 21:02ra bitartean Miramonetik), maiztasuna 7-8 minutukoa izango baita. Igande eta jaiegunetan ordutegiak lehen irteeretan eguneratuko dira, eta 11:05etik 20:07ra bitartean Boulevardeko (11:20tik 20:30era bitartean Ospitaleetatik), tarte horretan maiztasuna 8-9 minutukoa izango baita.
Garbera II geraleku berria 31 linearako
Astelehenetik aurrera, apirilak 27, Dbuseko 31-Intxaurrondo-Ospitaleak-Altza lineak geraleku berria izango du Garberan, Garbera II izenekoa. Eraikinaren alboan egongo da, lurpeko aparkalekura sartzeko arrapalaren ondoren (ikusi irudia). Altzarantz doanean zein Loiola-Amarantz doanean geratuko da geraleku horretan. Era berean, Garbera IIk Garbera geralekua ordezkatuko du linea horretarako.
Bestalde, 22:35ean merkataritza gunetik irteten den 33-Larratxo-Intxaurrondo-Berio-Igara linearen zerbitzu bereziak (Garbera-Boulevard) geraleku bietan egingo du geldialdia: lehenengo, Garberan, eta gero Garbera IIn.
DTK-k Memoria aurkeztu du eta 2025aren balantzea egin du
DTK-k 2025eko ekitaldiari dagozkion urteko kontuak eta Erantzukizun Sozial Korporatiboari (ESK) buruzko Memoria aurkeztu ditu Administrazio Kontseiluan. Memoria jada eskuragarri dago Dbusen web orrian: www.dbus.eus
2025ean, Dbusek bere historiako bidaia kopuru onenak izan ditu, urtean 33 milioi bidaiako kopurua gainditu baitu lehen aldiz. Erabateko errekorra izan da. DTKn kontabilizatutako bidaien kopurua, Dbuseko eta Dbiziko zerbitzuak barne, 35.044.276 bidaiakoa izan da, eta 2024an 33.321.324 bidaiakoa izan zen.
Konpainia osatzen duten pertsona guztien ahaleginari esker, eta Udalari esker, akziodun den heinean, eta baita egunero-egunero garraio publikoaren alde egiten duten erabiltzaileei eta garraio publikoaren bilakaeraren oinarri diren aurrerapen teknologiko handiei esker ere, gaur egun Konpainia hiri garraioko enpresa eraginkor eta aurreratuetako bat da Europan.
- Bidaiak Dbusen
2025ean, 33.735.379 autobus bidaia erregistratu dira Dbuseko zerbitzuetan, eta aurreko urtean, berriz, 32.026.966 bidaia erregistratu ziren.
Linea erabilienei dagokienez, 13- Altza linea izan da, bigarren urtez, bidaiari gehien erregistratu duena, eta bere atzetik 28- Ospitaleak-Altza eta 5-Benta Berri lineak daude. Hiru lineek AENORen kalitate ziurtagiria dute, Bidaiarien Garraio Publikoari buruzko UNE-EN 13816 arauak araututa, baina arauak ezartzen dituen konpromisoak, hiru linea horietan ez ezik, autobus flota osoan eta Konpainiaren eguneroko funtzionamenduan ere aplikatzen dira.
- Bidaiak Dbizin
Dbizi bizikletak alokatzeko sistemaren erabilerak gorantz egiten jarraitu du 2025ean. Hala, 2025ean 1.308.897 bidaia erregistratu dira, eta 2024an, berriz, 1.294.358. Horrez gain, 1.300.00 bidaiako muga gainditu da lehen aldiz. Azpimarratzekoa da ohiko erabiltzaileek bizikleta elektrikoak nahiago dituztela argi eta garbi. Urtean egindako bidaia guztietatik, %73,82 bizikleta mota horrekin egin dira.
Abonatu kopuruari dagokionez, 2025 abuztuan erregistratu zen abonatu kopururik handiena: 15.192 erabiltzaile. Horrek esan nahi du sisteman gutxi gorabehera %12,46 abonatu gehiago egon direla, pasa den urteko daturik onenarekin alderatuta (13.508 abonatu 2024ko abuztuan).
- Flota gero eta jasangarriagoa
Bideberdea da Dbusek flota eraldatzeko eta 2030erako Donostian garraio %100 jasangarria izateko egiten duen apustu estrategikoa. Bere helburu nagusia da emisio kutsakorrak murriztea, flota autobus elektrikoekin berrituz.
Pasa den urtean, Dbusek bere flotaren eraldaketa sendotzeko lanean jarraitu du, azpiegitura elektrikoaren errendimenduaren hobekuntzan eta eguneroko operatibaren optimizazioan fokua jarrita, ezarritako helburua lortzeko ezinbesteko elementuak baitira. 2025ean Dbuseko flota aurreko ekitaldietan baino nabarmen errespetutsuagoa eta jasangarriagoa da. Garrantzitsua da azpimarratzea 12 metroko 92 autobusetatik 41 elektrikoak direla eta 45 hibridoak, hau da, 12 metroko autobusen %93,4 teknologia hibridoz/elektrikoz eragindakoak direla. Oso ratio garrantzitsua da, eta Estatuko garrantzitsuenetako bat da. Era berean, 18 metroko 41 autobusetatik 9 hibridoak dira eta 7 elektrikoak, eta hori Dbuseko flotaren %39 da.
Aldi berean, Kotxetegietako azpiegitura elektrikoa modernizatu da eta kontsumoa optimizatzeko, galerak murrizteko eta eraginkortasun operatiboa hobetzeko aukera ematen duten karga adimenduneko sistema berriak instalatu dira.
- Kotxetegiak elektrifikatzea
2025ean, Kotxetegietako azpiegitura erabat egokitzeko azken urratsak egin dira, 2024an eraikin nagusia elektrifikatzeko lanak amaitu ondoren. 17-Gros-Amara-Miramon linea zerbitzu %100 elektriko bihurtzeko, beharrezkoa da kotxetegietako aparkaleku berriak, 2021ean inauguratu zenak, linearako aurreikusita dauden bederatzi ibilgailuak kargatzea ahalbidetuko duten karga estazioak izateko behar den azpiegitura edukitzea.
Obrak 2026ko azken hiruhilekoan amaitzea aurreikusita dago. Azpiegituraren barruan, instalazio elektriko osoa (hartunea, tentsio ertaina eta behe tentsioa), datuen sarearen azpiegitura, beharrezko egitura metalikoa, baterien karga eta suteen aurkako babesaren instalazioa ere sartzen dira. Eskualde Garapeneko Europako Funtsarekin (FEDER) kofinantzatuko da, FEDER 2021-2027 Euskadiko Programaren esparruan.
- Munduko ticketing sistemarik hoberena duen garraio publikoko operadorearen saria
2025eko martxoan, Dbusek munduko ticketing onena duen garraio publikoko operadorearen saria jaso zuen, “Transport Ticketing Awards” sariak banatzeko Londresen egin zen ekitaldian. Nazioartean ospe handia duen aitortza da, eta garraioa jasangarriagoa eta eraginkorragoa izan dadin berrikuntzak egitearen alde bikain ari diren garraio publikoko operadoreen lana azpimarratzen du.
Ticketing sisteman ezarri dituen jarduketa ugariri esker aukeratu dute Dbus. Jarduketa horien artetik, nabarmentzekoa da autobuseko bidaia txartela QR kodearen bidez, Mugi, Bat eta Barik garraio txartelekin, kontakturik gabeko banku txartelekin eta lotutako gailu digitalekin ordaintzeko aukera egotea. Era berean, beste jarduketa azpimarragarri bat izan da ticketing datuetan oinarrituta erabiltzailearen jatorria-helmuga matrizea kalkulatzeko eta zerbitzua ematen ari den autobus bakoitzaren denbora errealeko okupazioa zenbatesteko ezarri den sistema. Baloratu zen, halaber, geralekuetan autobusaren zain dauden erabiltzaileak zenbatu ahal izatea eta, horrela, datozen egunetarako eskaera iragarri ahal izatea, baliabideak optimizatzeko.
Azpimarratzekoa da sariarekin aitortzen dela garraio publikoa asko erabiltzen dela (Donostia da autobusen erabilera indizerik handiena duen hiria; donostiar bakoitzak 200 bidaia inguru egiten ditu, Europako erabilera kopuru handienetako bat eta antzeko tamaina duten gainerako hirietako erabilera kopuruaren oso gainetik), autobus zerbitzua etengabe hobetzen dela (abiadura komertziala eta puntualtasuna handiak dira), zerbitzuetan maila teknologiko aurreratua duela, ticketing sistemaren hobekuntzak egin direla eta kutsatzen ez duten garraiobideen erabilera sustatzeko hainbat ekimen egin direla. Faktore horiek guztiak funtsezkoak izan dira epaimahaiaren balorazioan eta sari ospetsu honekin jasotako aitortzan, horrek bultzatzen gaitu-eta kalitatezko garraio publikoa eskaintzeko lanean jarraitzera.
Tb6-Uliako Taxibuseko geraleku berriak
Martxoaren 9tik aurrera, astelehenez, TB6-Uliako Taxibus zerbitzuak bi geraleku berri izango ditu Grosen.
– Nafarroa Hiribidea 34 (Ulia alderantz doala), Groseko Anbulatorioa eta Erloju geralekuen artean.
– Jesuitak (Gros alderantz doala): Toki Eder eta Mariaren Bihotza geralekuen artean.
Horrela, Ulia eta Gros arteko lotura indartuko da, eta erabiltzaileei ematen zaien zerbitzua hobetuko da.
Martxoaren 9tik aurrerako erreserbak egin daitezke dagoeneko web orriaren bitartez (eskaera orrira sartu) ala telefonoz, 943 930 283 zenbakian.
Dbizi sistemak hazten jarraitzen du eta 2025ean 1.300 bidaia baino gehiago erregistratu ditu
Dbizi Donostiako bizikleta alokairuko sistemaren erabilera nabarmen handitu da 2025ean, 1.308.897 bidaia zenbatuta. Horrek esan nahi du 2024ko datuekin alderatuta erabilerak gora egin duela, orduan 1.294.358 joan-etorri erregistratu baitziren, eta lehen aldiz 1.300.00 bidaiako langa gainditu dela. Bilakaera horrek zerbitzuaren harrera ona eta ohiko bidaietarako alternatiba gisa sendotu dela berresten du.
Abonatu kopuruari dagokionez, abuztuan erregistratu zen abonatu kopururik handiena: 15.192 erabiltzaile. Horrek esan nahi du sisteman gutxi gorabehera %12,46 abonatu gehiago egon direla, pasa den urteko daturik onenarekin alderatuta (13.508 abonatu 2024ko abuztuan). Azpimarragarria da, halaber, 2025ean egon diren abonatu berrien kopurua aurreko sisteman lortutako abonatu kopuru maximoaren ia boskoitza izan dela.
2025ean ere Dbiziko erabiltzaileek bizikleta elektrikoa nahiago izan dute argi eta garbi, bidaien %73,82 bizikleta elektrikoarekin egin baitituzte (966.167 bidaia); bizikleta mekanikoekin egin diren bidaiak, berriz, %26,18 izan dira (342.710 bidaia). Bizikleta bakoitzeko eta egun bakoitzeko egindako bidaia ratioari dagokionez, bizikleta elektrikoarekin egindako bidaia kopuru handiena abuztuan erregistratu zen, egunean 14,04 bidaia eginda batez beste, eta bizikleta mekanikoekin egindako bidaien kasuan bizikleta bakoitzeko eta egun bakoitzeko bidaia kopuru maximoa urrian erregistratu zen, 4,26 bidaiarekin.
Bestalde, Dbiziko bizikletetan egindako bidaia gehienek 15 minutu baino gutxiagoko iraupena izan dute, eta horien atzetik 15-30 minutuko iraupena izan duten bidaiak daude. Datu horien arabera, bizikletak ahalik eta gehien txandakatzea lortzeko ezarritako helburua betetzen ari da. Zehazki, 2025ean bidaien batez besteko iraupena 2024an baino txikiagoa izan da (12 minutu eta 15 segundo 2025ean, eta 13 minutu eta 40 segundo, berriz, aurreko urtean). Erabilera generoaren arabera aztertuz gero, 2025ean emakumeek bidaien %34,06 egin zituzten eta gizonek %65,94.
Era berean, DTKn pasa den urtean kontabilizatu ziren bidaien kopurua, Dbuseko eta Dbiziko zerbitzuak barne, 35.044.276 bidaiakoa izan da, eta 2024an, berriz, 33.321.324 bidaiakoa izan zen. Horrek esan nahi du %4,9 egin duela gora.
