Category : Berriak

Dbus eta Gipuzkoako Garraioko Lurralde Agintaritza (GGLA), Baionako Aglomerazioko Garraio Sindikatuarekin batera (STACBA), E-MOBASK proiektuan parte hartzen ari dira Euskal Eurohiriaren garraio publikoaren erabilera bultzatzeko eta errazteko. 

Proiektuan parte hartzeko hiru erakundeek eratu duten partzuergoa onartua izan da POCTEFA 2014-2020 programaren deialdian. Europako lurralde lankidetzarako INTERREG tresnaren zati bat da programa hau. Proiektuak 3 urteko iraupena edukiko du, 2018ko urtarrilaren 1ean hasiko da eta 1.182.358€-ko diru laguntza bat eskuratuko du. Ekintzak Donostia-Irun-Baiona igarobidetik zehar egingo dira. 

E-MOBASKek mugaz gaindiko eremuan garraio publikoa hobetzea bilatzen du, garraioa errazagoa, erakargarriagoa eta iraunkorragoa izan dadin eta garraio publikoa erabiltzera bultzatzeko, ibilgailu pribatuaren aurretik. Horretarako, mugaz gaindiko erabiltzaileak hobeto informatuta egon daitezen eta bidaia ordaintzea errazago eduki dezaten ekintzak planteatzen dira, bai eta iraunkorragoa eta ingurumenarekin errespetutsuagoa den garraioa bultzatzeko ekintzak ere. 

E-MOBASKek hiru ardatz nagusi ditu: 

– Informazioa hobetzea erabilgarri dauden komunikazio euskarrien bitartez: mugaz gaindiko informazioa osotuagoa eta ulerkorragoa izan dadin itzuli behar diren edukien analisia, eta webguneetako eta appetako informazioa hobetzea, bai eta webgune eta app horien bitartez MUGI zerbitzuetara sartzeko bideak eta zona bietako seinaleak ere, geltokietan –seguruenik eguzki panelak– eta autobusen pantailetan bidaiarientzako informazio panelak instalatzeaz gain. 

– Ticketing integratua eta ordainketa modu berriak: Interoperabilitatea STACBAren aldeko eta Euskal Autonomia Erkidegoko ticketing sistemen artean, BAT-BARIK-MUGI ticketing sistema horretarako sarbidea hobetzea; eta kontakturik gabeko EMV banku txartelekin eta QR kodeekin ordaintzeko modua ezartzea Donostian. 

– Elektromugikortasuna eta garraio publikoaren energi efizientzia hobetzea: Dbusek eta STACBAk martxan jarritako autobus elektrikoen inplementazioa aztertzea eta konparazio azterketa bat egitea Donostiako eta Baionako emaitzak aztertzeko. Era berean, bi sistema berri ezarriko dira Dbuseko diesel autobusetan, energi efizientzia hobetzeko: Batetik, Start-Stop sistema flotaren 2 autobusetan ezarriko da –sistemarekin motorra gelditu daiteke geldialdietan erregai kontsumoa eta igorpen kutsatzaileak murrizteko; eta bestetik, EKObus sitema autobus flota osoan ezarriko da –soluzio teknologiko horrek eraginkortasunez gidatzen laguntzeko sistema bat dauka eta anti-bunching sistema bat (bat ez egiteko sistema) linearen maiztasunari eusten saiatzeko eta, beraz, geltokietako ordutegiak hobeto betetzeko–. EKObus aktibatu egiten da autobusa martxan dagoela, eta horregatik Start-Stop sistemaren osagarria da. 

Mugaz gaindiko garraio publikoa erabiltzea sustatzen saiatzen diren neurriak dira. Kalitateko zerbitzua eskaintzen dute, garraioa ulerkorragoa, erabiltzen errazagoa eta iraunkorragoa izatea ahalbidetuko duten hobekuntzetan oinarrituta. 

Bigarren urtez jarraian, Donostia Kulturak eta Dbusek Liburuak martxan ekintza antolatu du, Literaktum literatura jaialdiaren barruan, Donostiako garraio publikoan irakurketa bultzatzeko. Azaroaren 14tik 25era, jaialdiak irauten duen bitartean, Dbuseko autobusean irakurtzen doazenek liburu bat jasoko dute opari.   

Liburuak martxan ekimena pasa den urtean egin zen lehenengo aldiz, Liburu bat, bidaia bat lelopean, 2016ko Europako Kultur Hiribirutzaren barruan, 2015ean Errumaniako Cluj-Napoca hirian egin zen antzeko ekintza batean inspiratuta. Oraingo honetan, liburuak Donostiako hamar liburudendak emandakoak izan dira, hainbat generotakoak dira, hala nola nobela eta poesia, eta adin desberdinetako pertsonentzat dira. 

Aurten, Literaktumek 50 gonbidatu dauzka eta gonbidatuek 54 jarduera ingurutan parte hartuko dute, literatura publiko guztiengana hurbildu nahian. Kultur zentroek, liburutegiek, liburudendek eta Donostiako beste gune batzuek parte hartuko dute jaialdian. 

Era berean, jardueraren berri emateko, gaur Dbuseko autobus guztiek Literaktum kartela daramate. 

Bihar, asteazkena, azaroak 15, Entzutearen Eguna ospatuko da. Dbusek bat egin nahi du egun horretarako Gipuzkoako Itxaropenaren Telefonoak antolatutako jarduerekin, eta horren bidez hari babesa erakutsi, bere errealitatea beste norbaitekin partekatu behar duenari entzunez egiten duen lanagatik. 

Horregatik, bihar Donostiako hiri autobus guztiek kanpainaren kartela eramango dute egun osoan.

Dbuseko app-a da donostiarrek gehien erabiltzen dituzten udal aplikazioetako bat. Aurtengo ekainean aplikazio mugikorraren bertsio berria kaleratu zen, eta harrez gero app-aren  68.541 deskarga baino gehiago egin dira. 

App-a doakoa da eta Android, iOS eta Windows Phoneko online dendetan deskargatu daiteke. Euskaraz, gaztelaniaz, ingelesez eta frantsesez dago eskuragarri. Azken bertsioak informazio osotuagoa eskaintzen du eta hobekuntza ugari aurreko bertsioen aldean, hala nola iritsiera alertak, hurrengo zerbitzuen gaineko informazioa, Mugi txartela kargatzeko sarbidea, soinu bidez informazioa edo tutorial bat. 

Era berean, 2018ko urtarrilaren 1etik aurrera bertsio zaharrek funtzionatzeari utziko diote; beraz, garrantzitsua da erabiltzaileek app-a eguneratzea mugikorrean eta azken bertsioa deskargatzea. 

Desgaitasuna duten erabiltzaileekiko harremana eta tratua hobetzeko asmoarekin, Dbusek prestakuntza ikastaro bat antolatu du gidarientzat, Gureaken laguntzarekin. Prestakuntzaren asmoa da gidariei tresnak eta teknikak ematea Dbusen zerbitzuak erabiltzen dituzten desgaitasuna duten pertsonekin harreman egokia eduki dezaten.   

Lehen saio hauetara 60 gidari joaten ari dira, eta poliki-poliki plantillako gainerakoei ere emango zaie prestakuntza hori Prestakuntzan desgaitasunaren gaineko oinarrizko kontzeptuak aztertzen dira, bai eta hainbat desgaitasunekin zerikusia duten ohiko egoerak eta desgaitasun fisiko, sentsorial edo psikikoren bat duten pertsonekin edozein egoeratan harremanak izateko beharrezkoak diren trebetasunak ere. Horretarako, prestakuntza kasu praktikoetan, bideoetan eta role playing-ean oinarrituko da Metodologia horri esker, parte hartzaileek desgaitasuna duten pertsonen egunerokoan ohikoak diren egoerak esperimentatuko dituzte, haien lekuan jartzeko eta kolektibo horri eskaintzen zaion zerbitzuan hobetzeko. 

Gureak desgaitasuna duten pertsonentzako lan aukera egonkorrak eta egokituak sortu eta kudeatzen dituen enpresa talde bat da.  Kolektibo horren integrazioa errazteko eta haien premiei erantzuteko, GUREAK neurrirako ikastaroak eta materialak lantzen ditu, desgaitasuna duten pertsonekiko harremanaren eta tratuaren gainean.   

Aldian-aldian Dbuseko gidariek prestakuntza ikastaroak jasotzen dituzte hainbat arloren gainean, esaterako, ibilgailu moten gainean edo pertsonen arteko harremanen gainean. Beraz, ikastaro berri honekin prestakuntza hori sendotu egingo da, gaitasun desberdinak dituzten erabiltzaileekiko tratua landuta. Helburua da Donostian eskaintzen den eta Donostiako herritarrek hain ondo baloratzen duten zerbitzua egunez egun hobetzea. 

Era berean, azken urteetan aurrerapen handiak egin dira irisgarritasunari dagokionez. Aurrerapen horiek batzuk dira, esaterako, ibilgailuen %100 egokituta egotea, autobusetan, geltokietan eta mugikorreko aplikazioan autobusen iritsiera orduak eta geltokiak jakinarazteko soinu bidezko sistema, edo itsuek seguru eta eroso bidaiatu dezaten Donostiako Garraio Araudian itsuei beste pertsona batekin batera bidaiatzeko ematen zaien aukera, laguntzaileak ezer ordaindu beharrik gabe.

Dbusek bat egiten du urriaren 19an ospatuko den Bularreko Minbiziaren Aurkako Nazioarteko Egunarekin. 

Horregatik, bihar, osteguna, Donostiako hiri autobus guztiek lazo arrosa  bat eramango dute, gaixotasun hau pairatzen dutenei babesa eta elkartasuna erakusteko eta kontzientzia sozial handiagoa lortzeko egingo diren jardueretan laguntzeko. 

In Der City Bus Frankfurten egoitza duen autobuseko garraio operadore alemaniarraren ordezkaritza bat egon da Dbus bisitatzen, Kotxetegietako instalazioak ezagutzeko eta Konpainiak dituen autobus elektrikoen funtzionamendua zehaztasunez ikusteko.

 Ordezkaritzako kideek aukera izan dute Dbusek dituen 3 autobus %100 elektrikoak ezagutzeko, zeinak Irizarrek fabrikatutakoak baitira. Ibilgailu horiekin zaratarik eta igorpen kutsatzailerik gabeko garraio publikoa eskaini daiteke. Teknikariek, halaber, ibilgailu horien zaintzarako eta kargarako sistema ikusi ahal izan dute, autobus hibridoen funtzionamendua egiaztatzeaz gain. Une honetan Dbusek 20 autobus hibrido dauzka, beraz, 12 metroko autobusen %25 ibilgailu elektriko-hibridoak dira. Ibilgailu horiek garbiak dira eta ingurumenarekiko errespetutsuak, eta erabiltzaileek oso ondo baloratzen dituzte. 

Alemaniako ordezkaritza, halaber, Dbusen ezarritako beste sistema batzuez interesatuta agertu da, zehazki puntualtasuna eta abiadura komertziala handia edukitzea eta Donostiako hiritar askok Dbuseko autobusak erabiltzea ahalbidetzen duten sistemez. Ildo horretan, teknikari alemaniarrak harrituta geratu dira ikustean Dbuseko autobusak asko erabiltzen direla eta erabiltzaileak geltokietako panel elektrikoen bidez, mugikorrerako app-aren bidez eta web orriaren bidez informatzeko ditugun sistemen kalitatea.

Dbusek bere autobusetako irudi korporatiboa eguneratuko du, Donostiako Udalaren irudi berria gehituz. Eguneraketa hau 2017ko uztailaren 21ean onartu zuen Dbuseko Administrazio Kontseiluak, erabiltzaileekiko komunikazioa hobetzeko eta Dbuseko zerbitzua Udalaren garraio zerbitzua dela identifikatzeko.

2004an Dbusek bere irudi korporatiboa modernizatu zuen, logotipotzat Euskal Herriko hegoaldeko zuhaitz igela hartuta eta izen komertzialtzat Dbus izena. Era berean, diseinuan urdina eta berde koloreak sartu ziren. Urdina Donostiari lotutako kolorea da eta berde koloreak, berriz, Dbusek ingurumena hobetzen egiten duen ahalegina agerian jarri nahi du. Azken hamarkadan Dbuseko irudi korporatiboa sendotzen joan da eta oso marka ezaguna bihurtu da, bai maila lokalean bai kanpoan, Europako proiektu askotan parte hartzeagatik eta Estatuko eta nazioarteko erakunde askorekin elkarlanean aritzeagatik. 

2017ko maiatzean, Donostiako Udalaren Tokiko Gobernu Batzordeak Udalaren irudi korporatibo berria onartu zuen. Diseinuaren abiapuntua da Udalak azken hiru hamarkadetan erabilitako logotipoa, eta logotipo hori, aldi berean, hiriaren armarri ofizialean oinarrituta dago. Udalaren irudia berritzeko planteamendua udalaren menpeko departamentu eta erakunde guztien irudia bateratzeko eta integratzeko prozesuaren baitan egin da, udal administrazioak eskaintzen dituen zerbitzu guztiak biltzeko proiektu gisa.

Irudi biak batuz, hau da Dbusen irudia eta Udalaren irudi berria batuz ateratzen den diseinu berria, hasteko, autobusen aurrealdean eta albo luzean aplikatuko da eta, ondoren, autobusen atzealdean ere sartuz joango da. Era berean, gaurtik aurrera erosten diren autobus berriei diseinu berria jarriko zaie.