Garberara iritsi da Dbusen historiari buruzko erakusketa
Garberara iritsi da Dbusen historia eta Donostiako autobus garraio publikoaren bilakaera biltzen dituen erakusketa, eta gaur, azaroak 18, hasi eta hurrengo abenduaren 8ra arte egongo da ikusgai. Erakusketa hau irailean egindako Mugikortasunaren Astearen harira sortu zen, eta Alderdi Ederren egon zen ikusgai. Orain, berriz, hiru astez bisitatu ahal izango da kokapen berri honetan.
Hainbat panelez osatuta egongo da erakusketa, non bisualki jasoko baita Konpainiak 1886an sortu zenetik izan duen bilakaera, bai eta konpainiaren flotak flota moderno eta jasangarri bihurtu arte izan duen eraldaketa ere. Errepaso historiko horretaz aparte, autobus elektriko berrien eta autobus horiek dituzten gailuen funtzionamenduaz, ibilgailu berritzaile horien fabrikazio prozesuaz eta bateria elektrikoen funtzionamenduaz eta ezaugarriez informazioa biltzen du, bai eta herritarrentzat dakartzaten abantaila eta onuren gainekoa ere.
Baina, erakusketa ikusteaz gain, Garberako bisitariek 1989ko Mercedes autobus batera igotzeko aukera izango dute. Autobus horrek 2004ra arte eman zuen zerbitzua Donostian. Ibilgailu hori Garberan ikusi ahal izango da, azaroaren 22an eta 29an, larunbatez, 11:00etatik 14:00etara eta 17:00etatik 21:00etara, Agabus elkarteari esker. Agabus Autobus Lagunen Gipuzkoako Elkartea da, Dbusen barruan sortu zen, eta hiriko mugikortasunarekin lotutako ondarea kontserbatzeko lanean dihardu.
Horrela, Garberak eta Dbusek bat egiten dute erakusketa honekin, garraio publikoaren garrantzia ikusarazteko. “Garberara iristea gero eta errazagoa eta jasangarriagoa izatea nahi dugu, gure komunitatearekin dugun konpromiso handietako bat da-eta. Erakusketa honek, hain zuzen ere, gure hiriko mugikortasun jasangarriari balioa ematen dio, eta bultzatzen eta indartzen jarraitu behar dugu mugikortasun hori”, berretsi du Nuria Vegas Garberako gerenteak, gogorarazita espazio horrek garraio publikoa ez ezik, oinez, bizikletaz edo ibilgailu elektrikoetan iristea ere sustatzen duela, kargatzeko guneak eta aparkaleku egokituak eskainiz.
Dbusek, berriz, 23 autobus %100 elektriko ditu une honetan, eta datozen asteetan flotan 12 metroko 24 autobus berri gehitzea espero da. Horri esker, flotako autobusen %30 elektrikoak izango dira. Flotaren eraldaketa Bideberdearen parte da, hots, Dbusek eta Donostiako Udalak garraio publikoa zerbitzu garbi, eraginkor eta isila bihurtzeko egindako apustua, 2030ean Dbuseko flota %100 jasangarria izan dadin.
Garberan egon ondoren, asmoa da erakusketa hau hiriko puntu gehiagotara iritsi ahal izatea eta Donostiako herritarrei Dbusen historiaren zati bat eta orainaren eta etorkizunaren zati bat ere hurbildu ahal izatea.
Garraio publikoa turismoaren mugikortasun oinarri gisa hartuta hizpide izan duen mahai inguru batean parte hartu du Dbusek
Turismo eta Mugikortasunari buruzko 1. Jardunaldiak egin dira, Madrilen, eta bertan parte hartu du Dbusek. Jardunaldietan garraioko eta turismoko adituak elkartu dira, mugikortasunaz gogoeta egiteko eta eztabaidatzeko, mugikortasun eraginkorrak turismo jasangarriagoa, konektatuagoa eta irisgarriagoa nola bultzatzen duen ikusteko. Jardunaldiak Movusek eta Espainiako Turismoaren Mahaiak antolatu dituzte.
Jardunaldian, Igor Gonzalez Dbuseko zuzendari gerenteak mahai inguru batean parte hartu du, Madrilgo EMTko, Bartzelonako Garraio Metropolitanoetako eta Madrilgo Metroko ordezkariekin batera. Mahai inguru horretan, Igor Gonzalezek garraio publikorako sarbide unibertsalaren alde egin du, erabiltzaileen esperientzia positiboa izateko eta oztopoak desagerrarazteko, garraio publikoa erabiltzea errazagoa izan dadin, eta egoiliar eta bisitarientzako zerbitzua hobea.
Dbusek sistema bat baino gehiago ditu ordainketarako, eta, horri esker, Donostian autobusa erabiltzen dutenei aukera ugari eskaintzen zaie ordainketa egiteko: batetik, MUGI garraio txartelak, Donostiako herritarrentzat edo eskualde mugakideetan bizi direnentzat; bestetik, BAT eta BARIK txartelak, Arabako eta Bizkaiko txartelak, hurrenez hurren; eta, beste sistema berritzaileago batzuk ere, hala nola kontakturik gabeko banku txartelekin eta gailu mugikorrekin ordaintzeko aukera edo Dbuseko aplikazio ofizialaren bitartez erosten diren QR kodeekin ordaintzeko aukera, eskudiruarekin ordaintzeko aukeraz gain. Ordainketa egiteko dauden askotariko moduei esker, autobusera arinago sartu ahal izango da, eta abiadura komertzial handiagoa mantendu. Horrek, halaber, autobusa garraio lehiakor eta eraginkorra izatea egingo du, eta turismoaren eta herritarren elkarbizitzaren arteko oreka zaintzen lagunduko du.
Flotaren elektrifikazioa ere beste erakargarritasun handi bat da hirian zehar mugitzeko. Ibilgailu jasangarriak eta isilak izango dira, eta bidaia esperientzia atseginagoa eta hiria bizigarriagoa izatea egiten dute. Dbus elektrifikazio proiektu integralean murgilduta dago, zeinarekin flota deskarbonizatu ahal izango den, 0 emisioko flota bihurtuta. Proiektuaren barruan sartzen dira hornidura elektrikoaren egokitzapena, karga azpiegitura berrien hedapena, autobus elektriko berrien sarrera eta Dbuseko trafikoaren mantentze eta gestio arloen berrantolaketa, horrela, trantsizio eraginkorra eta jasangarria bermatzeko.
Zerbitzuaren ezaugarri horiei esker, garraio publikoa, mugitzeko bitarteko ez ezik, hiriaren balioen erakusgarri ere bada, balio hauen erakusgarri, alegia: jasangarritasuna, berrikuntza eta zerbitzu publikoa.
Urrian, Dbusek bere historiako hileko daturik hoberenak erregistratu ditu, erabiltzeen kopuruan markak hautsita
Urrian, Dbusek hilabete batean orain arte zenbatutako daturik onenak erregistratu ditu, eta lehen aldiz gainditu du hiru milioiko zifra erregistratutako hileko bidaietan. Zehazki, 2025eko urrian 3.008.255 bidaia erregistratu dira. Horrek esan nahi du, beraz, Konpainiaren historian erabateko errekorra izan dela.
Urrian, 2025 osoan egon den joera sendotu da. Autobusaren erabileran egon den gorakada horren ondorioz, Dbusek 28.123.649 bidaia zenbatu ditu urteko lehen 10 hilabeteetan, iaz, garai berean, erregistratutako bidaiak baino %5,39 gehiago. Hurrengo grafikoan jasotzen da aldi honetan erregistratutako bidaia kopuruak azken 10 urteetan izan duen bilakaera.

Urte hasieratik hona, hauek dira bidaia gehien erregistratu dituzten bost lineak: 13-Altza, 3.505.326 bidaiarekin; 28-Amara-Ospitaleak, 3.462.494 bidaiarekin; 17-Gros-Amara-Miramon, 2.030.587 bidaiarekin; 5-Benta-Berri, 2.614.235 bidaiarekin; eta 26-Amara-Martune, 1.777.666 bidaiarekin.
Eskaeren gorakada honi ahalik eta zerbitzu onenarekin erantzuteko, Dbus lineen funtzionamendua monitorizatzen ari da, eta ordutegi eta linea batzuk erabilgarri dauden gidariekin indartzen, dauden baliabideen arabera.
Geraleku berri bat Dbusen 33-Larratxo-Intxaurrondo-Berio-Igara eta B1-Benta Berri-Berio-Añorga lineetan
Azaroaren 13tik aurrera, osteguna, Dbuseko 33-Larratxo-Intxaurrondo-Berio-Igara eta B1-Benta Berri-Berio-Añorga lineek geraleku berri bat izango dute Berion. Igara alderantz egongo da kokatuta, Berio 78 eta Berio 118 geralekuen artean: Berio – Arturo Campion. Geraleku horretan geldituko dira, halaber, Beriotik zirkulatzen duten 25-Benta Berri-Añorga lineako zerbitzuak (Añorga alderantz doazenak).
Geraleku berri honen helburua da inguruko bizilagunei eta inguruko ikastetxeetako erabiltzaileei zerbitzua ematea. Era berean, ingurune maldatsua dela kontuan hartuta, geraleku berri honekin aulki gurpildunetan dauden pertsonek errazago izango dute ingurune horretara iristea.
Dbusek Deustuko Unibertsitateko ikasleei erakutsi die bere kudeaketa eredua
Javier Vallejok, Dbuseko zuzendari ondokoak, enpresa kudeatzeko eredua aurkeztu du Deustuko Unibertsitateko Ingeniaritza Informatikoko Graduko Enpresen Administrazioa irakasgaiaren eduki akademikoaren parte gisa.
Saioan, ikasleek Konpainiaren historia eta bilakaera ezagutu dute, baita enpresaren eguneroko funtzionamendua eta enpresako sailen antolaketa ere. Besteak beste, planifikazioko sistema adituak ezagutu ahal izan dituzte, zeintzuei esker eraginkortasunez kudeatu daitezkeen autobusak eta gidarien ordutegiak antolatzeko dauden giza baliabideak eta baliabide teknikoak. Horrela zerbitzua optimizatu egiten da, pertsona erabiltzaileei ordutegi zabalagoak eta maiztasun hobea eskainiz eta aldi berean flotako autobusak eta gidariei esleitutako ordutegi ezberdinak koordinatuz.
Era berean, azken urteotan Dbusen ezarritako azken berrikuntza teknologikoak ezagutu dituzte, hala nola autobusen okupazioak kontrolatzeko sistema eta eskaria iragartzeko sistema. Era berean, ustiapenean laguntzeko SAE sistemaren eta Dbuseko ticketing sistemaren funtzionamendua ikusi ahal izan dute, batez ere QR kodeekin eta kontakturik gabeko banku txartelekin zein gailu mugikorrekin ordaintzeko sistema; geltokiak sentsorizatzeko sistema, geltokiko erabiltzaileen zenbaketaren kontrol ia zehatza egitea ahalbidetzen duena, eskaera aurreikustea ahalbidetuta; edo Konpainiako autobusetako bidaiarien jatorria-helmuga matrizea, big datan oinarrituta. Azkenik, Smart-Klima sistemarekiko interesa agertu dute. Autobusen klimatizazio sistema monitorizatzeko eta bere funtzionamendua hobetzeko balio du sistema horrek.
Sesioan ikasleek Konpainia buru-belarri sartuta dagoen eta flota deskarbonizatu eta 0 emisioko flota bihurtzea ahalbidetuko dion elektrifikazio proiektua integrala ezagutu ahal izan dute. Proiektuaren barruan sartzen dira hornidura elektrikoaren egokitzapena, karga azpiegitura berrien hedapena, autobus elektriko berrien sarrera eta Dbuseko trafikoaren mantentze eta gestio arloen berrantolaketa, horrela trantsizio eraginkorra eta jasangarria bermatzeko.
“Dbus eta Gabonak” haurrentzako XIX. marrazki lehiaketa

“Dbus eta Gabonak” haurrentzako marrazki lehiaketaren beste edizio bat abiarazi du Dbusek, 13 urte baino gutxiago duten neska-mutilentzat.
Urteroko lehiaketa honen bitartez, 2025ean lehiaketaren 19. edizioa izango baita, neska-mutilen sormena sustatu nahi da eta Donostian garraio publikoa erabiltzeak duen garrantzia helarazi nahi zaie, Donostiako hiri guneen eta donostiarren bizi kalitatearen iraunkortasuna bermatzeko balio baitu. Gabonetan, zehazki, garraio publikoaren erabilera funtsezkoa da mugikortasuna efizientea izatea bermatzeko.
LEHIAKETAREN OINARRIAK
Parte hartzailea 13 urtetik beherako edozein haur izan daiteke eta gai libreko marrazki bat egin beharko du. Baldintza bakarra Gabonen inguruko ideia bat azaltzea izango da, autobusarekin erlazionatuta.
Marrazkiak Fnac-eko erakusmahaian entregatuko dira (San Martin Merkataritza Gunea), lehiaketaren antolaketako laguntzailea baita, edo Dbuseko bulegoetan (Fernando Sasiain, 7), eta marrazkien atzealdean parte hartzailearen datuak jarriko dira:
- Izen-abizenak
- Adina
- Jaiotze data
- Helbidea
- Telefonoa eta harremanetarako posta elektronikoa
- Ikastetxea
- Baimendutako tutorearen izenpea
Ezinbestekoa da datu pertsonal guztiak adieraztea. Bestela, marrazkia lehiaketatik baztertuta geratuko da. Derrigorrezkoa izango da, halaber, formularioa betetzea parte hartzailearen legezko tutoreen baimenarekin:
> Baimen orria deskargatu (pdf)
Bi kategoria egongo dira:
- A Kategoria: 8 urte artekoa, hau da, 2017an edo geroago jaiotako haurrentzat.
- B Kategoria: 9 eta 12 urte artekoa; hau da, 2013an, 2014an, 2015ean edo 2016an jaiotako haurrek parte hartu ahal izango dute.
Marrazkiak jasotzeko azken eguna 2025eko azaroaren 11 izango da.
SARIAK
Epaimahaiak, Dbusek izendatua, kategoria bakoitzeko marrazki irabazleak hautatuko ditu.
- Lehen saria: Lenovo Tab tableta, bere fundarekin + Donostiako Aquariuma bisitatzeko 4 sarrera.
- Bigarren saria: Fujifilm Mini 12 Green argazki kamera + Donostiako Aquariuma bisitatzeko 4 sarrera.
- Hirugarren saria: liburu sorta eta idazketako sorta + Donostiako Aquariuma bisitatzeko 4 sarrera.
- Gainerako finalistek (4. postutik 10.era) Diploma bana jasoko dute.
Sariak banatzeko ekitaldia abenduaren 11n izango da, ostegunean, 18:00etan, Aquariumeko Auditorium aretoan.
Dbusek marrazkiak hedatu, publikoki erakutsi eta erreproduzitzeko eskubidea bere gain hartzen du, marrazkien egileek, euren lanaren autoretza onartzen zaielarik, inolako eskubiderik sortzen ez dutelarik. Marrazkiak Dbusen marketin kanpainetan erabiliak izan daitezke.
Lehiaketarako izena ematean parte hartzaileek ematen dituzten datuak Dbusen jabegokoa den fitxategi batean sartuko dira beraien tratamendurako, eta lehiaketan parte hartzea kudeatzeko erabiliko dira. Dbusen Pribatutasun Politikari buruz edota interesdunak honi lotuta dituen eskubideen erabileraz gehiago jakiteko, begiratu www.dbus.eus web orrian.
Marrazki finalistak DVbusen erakutsiak izango dira abenduan zehar eta Dbusen webgunean azalduko dira. Halaber, marrazkiak horretarako egokitutako leku publikoetan erakutsi ahal izango dira. Erakusketa amaitu ondoren, marrazkiak gorde egingo dira zaintzapean, hilabete bateko epean.
Noizbehinkako bidaia txartelaren tarifa aldaketa Dbusen
Bihartik aurrera, urriak 11, Dbuseko noizbehinkako bidaia txartelaren tarifa aldatuko da, baita QR bidaia txartelena ere. Hauek izango dira tarifa berriak:
| Bidaia txartela | Prezioa 2025/10/11 baino lehen | Prezioa 2025/10/11tik aurrera |
| Eguneko noizbehinkako bidaia txartela eta eguneko 30 minutuko bidaia txartel digitala (QR edo banku txartela eta gailu mugikorrak) | 1,85 € | 1,95 € |
| Gaueko noizbehinkako txartela eta gaueko 30 minutuko txartel digitala (QR edo banku txartela eta gailu mugikorrak) | 2,50 € | 2,65 € |
| QR bidaia txartela, 24 ordukoa | 6 € | 6,40 € |
| QR bidaia txartela, 48 ordukoa | 10 € | 10,60 € |
Era berean, MUGI, LURRALDEBUS, BAT eta BARIK txartelei aplikatzen zaizkien tarifak ez dira aldatuko, apirilean eta uztailean eguneratu baitziren.
Izan zitekeen Donostia, Dbuseko markesinetan
Urriaren 7tik azaroaren 14ra “Gazteluak airean edo nola eraiki utopia gaur egun” lelopean egingo den Euskadiko Arkitekturaren Nazioarteko Bienalaren bosgarren edizioaren esparruan, Dbuseko markesinek “Donostiako Ukroniak: Donostian egin ez ziren arkitektura eta hirigintza proiektuak” proiektua hartuko dute. Proiektua Santos Bregaña artista eta diseinatzailearena da, eta Open Mugak deialdi irekiaren bidez hautatu zen. Bienala/Mugak Eusko Jaurlaritzako Etxebizitza eta Hiri Agenda Sailak antolatzen du.
10 postalen bidez, markesinetan ikusiko dugu iraganean proiektatu ziren eta gauzatu ez ziren eraikuntza eta hirigintza proiektuei esker izan zitekeen Donostiari buruzko ikuspegi bat, bi aldetatik. “Ideia horiek gauzatu izan balira, nolakoa izango zen Donostia?” galderaren inguruko hausnarketa bisuala. Pentsatutako baina gauzatu gabeko proiektu horiek hirigintza erabakien eta horiek hirian duten eraginaren inguruko hausnarketa kritikoa dakarte: Kontxako badia portu industrial bihurtzea, Santa Klara uhartean adinekoentzako egoitza bat sortzea, Urgullen hiri lorategi bat sortzea, etab.
Markesinen alde batetik aurkezpen bisual bat jasotzen da eta markesinaren beste aldetik errealitate paralelo horietatik datozen testu epistolarrak jasotzen dira, Harkaitz Cano idazleak, hirian irudikatutako tokietako biztanle bihurtuta, toki horietako bakoitzetik postalak bidaltzeko idatzitakoak.
Postal horiek hiri ingurunearen etorkizunari eta hiri baten nortasuna moldatzeko duen gaitasunari buruzko gogoeta eragiten dute, eta datozen asteetan ikusi ahal izango dira markesinetan.
Dbusek 17 linearen eraldaketa aurkeztu du Garraio Publikoaren Nazioarteko Batasuneko adituen aurrean
Dbusek 17-Gros-Amara-Miramon linea eraldatu eta zirkulazio azkarreko zerbitzu elektriko eta adimendun bihurtzeko proiektua (BEI proiektua) aurkeztu du UITPk (Garraio Publikoaren Nazioarteko Batasuna) Coimbran (Portugal) antolatu duen Batzordean, non gaitasun handiko sistema mota horiek garatzen ari diren munduko hainbat lekutako hiriak bildu diren.
Dbusek BRT sistema du 5-Benta Berri eta 28-Amara-Ospitaleak lineetan eta une honetan 17-Gros-Amara-Miramon linean ezarriko den BEI (Bus Elektriko Adimenduna) etorkizuneko linean inplementatzea garatzen ari da. Sistemak hiru funtzio osagarri izango ditu: autobus artikulatu %100 elektrikoak erabiliko ditu, geralekuetako irisgarritasuna hobetuko da, eta autobusera ate batetik baino gehiagotik sartzeko aukera emango du.
Lan batzorde horretan, Javier Vallejok, Dbuseko zuzendari ondokoak, eta Eduardo Gonzalezek, Dbuseko zuzendari teknikoak, kalitate handiko autobus sistema honen (BRT) ezaugarriak aztertu dituzte garraio adituen aurrean, izan ere, autobus hauen funtsa da azkar eta eroso zirkulatzea, zirkulatzean lehentasuna ematen dioten errei berezien bidez, eta erabiltzaileei zerbitzu bikaina ematea. Sistemak ahalbidetzen du abiadura komertzial handia (16,60km/h) izatea eta Donostiako herritarren erabilera maila handia izatea. 2024an Dbusek bere historiako daturik onenak erregistratu ditu, zerbitzuetan 32.026.966 bidaia egin baititu, eta aurten seguruenik zifra horiek gaindituko dira, erabiltzaileen kopuruak berriro gora eginda.
Eduardo Gonzalezek batzordean azaldu duen bezala, geralekuetako irisgarritasuna hobetzeak espaloiaren eta autobusaren arteko distantzia murriztea ekarriko du, autobusera igotzea eta autobusetik jaistea erraztuta, eta arrapalen funtzionamenduko gorabeherak ere murriztuko ditu. Era berean, autobuseko ate batetik baino gehiagotik sartzeak eta irteteak autobusera sartzeko denborak hobetzea ahalbidetuko du, bidaia denbora murriztuta eta abiadura komertzial ona bermatuta. Javier Vallejok, berriz, autobusetan doazen bidaiarien kopurua eta baliozkotu diren bidaia txartelak kontrolatzeko ezarriko diren berrikuntza teknologikoak ere aurkeztu ditu.
Dbusen oso garrantzitsutzat jotzen dugu hiriko garraioaren hobekuntzan lanean ari diren enpresa eta erakundeekin harremanetan egotea, bere testuinguru partikularreko premietan zentratuta baina ikuspegi globalarekin, izan ere, kanpoko esperientzietatik ikasteko aukera ematen du, bai eta etorkizuneko ikuspegi berri bat lortzea ere, lankidetza berriak eta baterako proiektuak sortzeko aukerak irekitzeaz aparte.
DTK-k bere kudeaketa eredua aurkeztu du mugikortasun jasangarriari buruzko jardunaldi batean, “MoVer Ciudades” proiektuaren barruan
Donostiako Tranbia Konpainiak (DTK) bere kudeaketa eta efizientzia eredua eta Donostiako hiri garraioan ezarritako soluziorik berritzaileenak partekatu ditu gaur, Ekuadorko Hirietan Mugikortasun Berderako Proiektuaren (MoVer Ciudades) bisita teknikoan zehar, Donostian mugikortasun jasangarriari buruz antolatutako jardunaldian.
Ekuadorko tarteko hirietan emisio gutxiko hiri mugikortasun jasangarriaren inplementazioa indartu nahi duen proiektu bat da, ingurumena babesten eta herritarren bizi kalitatea hobetzen laguntzeko. Ekuador pertsona bakoitzeko berotegi efektuko gasen emisio gehien sortzen dituen herrialdeetako bat bihurtu da eskualdean, eta garraio sektorea da emisio horien %50 ingururen erantzulea.
MoVer Ciudades proiektua Global Gateway eta Europar Batasunak eta Alemaniako Lankidetza Ekonomiko eta Garapenerako Ministerio Federalak (BMZ) finantzatzen duten Europa Taldea: Itun Berde bat Ekuadorrentzat ekimenen parte da.
Jardunaldian, non mugikortasunean espezializatutako Ekuadorko zenbait teknikarik parte hartu baitute, DTK-ko zuzendari gerente Igor Gonzalezek Konpainiaren elementu bereizgarriak aurkeztu ditu, hau da, Konpainia sektoreko enpresa erreferente bihurtzen duten elementuak, eta, erabilera indize altua ez ezik, erabiltzaileen aldetik oso balorazioa ona edukitzea ahalbidetzen diotenak. Azken urteetan, antzinatasun handieneko garraio enpresa bat izatetik hiri mugikortasuna kudeatzen duen enpresa bihurtzera iritsi da, Dbusen bidez autobuseko garraio publikoko zerbitzua eta Dbizi bidez bizikleta publikoa alokatzeko sistema eskainita.
Ordezkaritzak enpresaren eguneroko funtzionamendua eta departamentuen antolamendua ezagutu ahal izan ditu. Besteak beste, planifikazioko sistema adituak ikusi ahal izan dituzte. Horiei esker, eraginkortasunez kudeatu daitezke autobusak zein gidarien ordutegiak antolatzeko dauden giza baliabideak eta baliabide teknikoak. Horrela, zerbitzua optimizatu egiten da, erabiltzaileei ordutegi zabalagoak eta maiztasun hobea eskainiz eta, aldi berean, flotako autobusak eta gidariei esleitutako ordutegi ezberdinak koordinatuz.
Aurkeztutako gaien artean, nabarmentzekoak dira tarifa sistema integrala eta Gipuzkoan, Bizkaian eta Araban, hurrenez hurren, erabiltzen diren MUGI, BAT eta BARIK garraio txartelen interoperabilitatea; izan ere, horri esker, Dbuseko ordainketa sistemak erosoak eta praktikoak dira erabiltzaileentzat. Horri lotuta, azken urteetan berrikuntza teknologiko ugari inplementatu dira, baliabideak optimizatzeko, benetako premietara egokitutako garraio sare bat diseinatzeko eta garraio publikora iristea errazteko, ordainketa sistemetan trabak ezabatuz. Dbusek munduko ticketing onena duen garraio publikoko operadorearen saria jaso du aurten, Londresen urtero banatzen diren Transport Ticketing Awards sarien banaketan.
Era berean, BRT sistema (Bus Rapid Transit) da aurkezpenean aztertutako beste puntu bat. Sistema hori linearik erabilienetako bitan dauka Dbusek (5 eta 28 lineak). Kalitate handiko autobus sistema bat da, zirkulazio azkar, eroso eta eraginkorrean oinarritua. Linea horiek, gainera, AENOR UNE-EN 13816 ziurtagiria daukate, zeinak lineen zerbitzuaren kalitatea aitortzen baitu. Zerbitzua beste inplementazio teknologikoekin indartu da, hala nola itsuendako audio sistemarekin edo zerbitzua denbora errealean geltokietan dagoen erabiltzaile kopurura egokitzen uzten duen sistemarekin.
Ildo horretan, garraio jasangarria bultzatzea da Dbusen lehentasunetako bat, elektromugikortasunean enpresa aitzindaria baita, 2014an Europan fabrikatutako lehen autobus %100 elektrikoa jarri zuena zerbitzuan. Gaur egun, Konpainia elektrifikazio proiektu integralean murgilduta dago, flotaren deskarbonizazioa ahalbidetzeko, 2030ean 0 emisioko flota izan dadin.
Proiektuaren barruan sartzen dira hornidura elektrikoaren egokitzapena, karga azpiegitura berrien hedapena, autobus elektriko berrien sarrera eta Dbuseko trafikoaren mantentze eta gestio arloen berrantolaketa, horrela, trantsizio eraginkorra eta jasangarria bermatzeko. Horrenbestez, Dbusen eta Udalaren apustua Bideberdea da, garraio publikoa zerbitzu garbi eta isil bihurtuko duena. Horrez gain, ordezkaritzak BEA (Bus Elektriko Adimenduna) proiektua ere ezagutu du, 17-Gros-Amara-Miramon linean ezarriko den gaitasun handiko sistema, zirkulazio azkarreko autobus %100 elektriko eta adimendunen bidez.
Halaber, aurkezpenean, Igor Gonzalezek Dbizi bizikleta publikoaren sistemaren funtzionamendua ere azaldu du. DTK arduratzen da sistema kudeatzeaz, Donostiako Udalak aginduta, sistemaren funtzionamendua hobetzeko eta bizikletaren erabilera sustatzeko, garraio publikoko beste modu batzuen osagarri gisa. Dbizi sistema berritua 2020ko abenduan jarri zen martxan, eta erreferentziazko sistema bihurtu da beste hiri batzuetarako. 2024an zerbitzuaren erabilera sendotu egin da, 1.294.358 bidaia egin baititu; aurreko urtean, berriz, 945.642 bidaia egin ziren.
Bukatzeko, Igor Gonzalezek enpresak gizartearen balioekin duen konpromisoa soziala azpimarratu du, zenbait elkarterekin dituen harremanetan eta kausa sozialen alde egindako lanean eratua. DTK-k garrantzi berezia ematen dio, halaber, leialtasuna eta sinesgarritasuna sortzeari, tokiko komunikabideekin eta herritarrekin harremana zuzena edukiz, eta enpatia sustatzeko eta gidariaren irudia indartzeko kanpainen bitartez.
